Sali Berisha dhe mbështetësit e tij kanë hedhur dje hapin e parë për të çuar në tym e flakë Partinë Demokratike. Qysh kur u përjashtua më 9 shtator nga grupi parlamentar i PD, ish-kryeministri Berisha paralajmëroi rrëzimin e kryedemokratit Lulzim Basha nga drejtimi i Partisë Demokratike, ndërsa në shumë deklarata ai i ka mëshuar edhe faktit se do ta rrëzojë me dhunë shefin aktual të selisë blu.
Por dje janë dhënë sinjalet e para, teksa njerëzit e Berishës kanë tentuar të marrin me dhunë degën e PD në qytetin e Fierit. Kështu, shumë militantët demokratë të Fierit të udhëhequr nga ish-kryetari Luan Baçi kanë mësyrë ditën e djeshme në selinë e Partisë Demokratike, ndërkohë që kanë protestuar lidhur me ndërrimin e bravës së derës nga drejtuesi i komanduar, Agron Kapllanaj.
Në shenjë revolta para kamerave, njerëzit që mbështesin deputetin Baçi, i cili tashmë është rreshtuar hapur krah aksionit të nisur nga ish-kryeministri Sali Berisha për rrëzimin e kreut të PD, janë shprehur se nuk e njohin kryetarin e komanduar nga Lulzim Basha, madje kanë premtuar se do bëjnë rezistencë kundër këtij puçi.
Valë kërcënimesh dhe akuzash
Por teksa ishte i pranishëm në Fier, ish-kryetari i degës, Luan Baçi shpërtheu në akuza të forta ndaj kreut të PD, Lulzim Basha, ndërsa theksoi para mediave se nuk e njeh të komanduarin Agron Kapllanaj që e zëvendësoi në detyrë. Madje Baçi u shpreh se ndodhej aty për të shmangur çdo përplasje të mundshme, pasi sipas tij Partia Demokratike është atje ku ndodhen njerëzit dhe jo vulat e zyrat.
Sipas Baçit, ndërrimi i bravës së derës në atë lloj mënyre është diçka e turpshme. “Sot ka ardhur momenti që të denoncohet ky veprim i turpshëm dhe ofendues për të gjithë. Sekretari i degës dhe sekretari organizativ erdhën të kryenin disa veprime, për të marrë disa karta dhe gjendën dyert e mbyllura. Për këtë arsye u bë dhe denoncimi në polici. Nuk ka punë mirëkuptimi, dega vazhdon aktivitetin e vet.
PD nuk është aty ku janë zyrat, por aty ku janë njerëzit. Unë nuk e njoh fare atë komandim që ka bërë Basha, nuk e njoh. Zyrat i ka uzurpuar një ekip që erdhi nga Tirana, u futën me kaçavida e ndërruan bravat. I gjithë problemi i degës së Fierit është me qendrën. PD janë anëtarët, nuk janë as zyra dhe as vula”, deklaroi Baçi.
Ja si nisi përplasja në degën e PD-së në Fier
Tensionet që kanë kapluar Partinë Demokratike në Fier, daton që më 20 tetor, atëherë kur kryedemokrati Lulzim Basha komandoi në krye të degës së këtij qyteti, ish-kreun e Bashkisë Mallakastër, Agron Kapllanaj. Por sipas Luan Baçit, i cili mbante këtë post, shkarkimi është bërë pa u njoftuar ai zyrtarisht.
Ka një paqartësi në lidhje me largimin e Baçit nga drejtimi i degës së PD Fier, pasi përkundër deklaratave të tij, para zgjedhjeve të 25 prillit Lulzim Basha nxori një urdhër ku kryetarët e degëve që donin të garonin për deputet, duhej të hiqnin fillimisht dorë nga posti lokal. Luan Baçi garoi si deputet në Fier në zgjedhjet e 25 prillit, ku edhe fitoi.
Megjithatë nisur edhe nga kjo, Baçi u pa në foltoren e Sali Berishës në Fier dhe pretendon se e gjitha ka ardhur si një hakmarrje e Lulzim Bashës pse doli hapur krah ish-kryeministrit. Sidoqoftë tensionet arritën kulmin dy ditë më parë, kur Kapllanaj ndërroi bravën e zyrës së PD-së në Fier, duke e argumentuar këtë veprim me faktin se ai është komanduar për ta drejtuar derisa kjo degë të dalë në zgjedhje sipas statutit të PD-së.
