Korça ka çelur zyrtarisht sezonin turistik veror me një nga ngjarjet më të dashura dhe të pritura të qytetit, Festivalin Ndërkombëtar të Karnavalit, që këtë vit feston edicionin e tij të 18-të.
Plot 35 grupe pjesëmarrëse, mes tyre edhe nga vendet e rajonit, kanë parakaluar përgjatë bulevardeve të qytetit, duke sjellë ritme, ngjyra, kostume dhe energji që kanë entuziazmuar banorët dhe vizitorët.
“Është hera imë e parë që marrë pjesë në Karnavale dhe është një festë shumë e bukur”, u shpreh një pjesëmarrëse.
“Traditë ku të gjithë mblidhen dhe është një eksperiencë shumë e bukur për të gjithë”, tha një tjetër pjesëmarrës.
Kryetari i Bashkisë, Sotiraq Filo, theksoi se karnavalet nuk janë vetëm një festë, por një mënyrë për të nxitur turizmin dhe ekonominë vendase.
“Shpresoj që do të kemi një sezon turistik të mbarë. Numrat e turistëve janë në rritje dhe besoj që turizmi do të vazhdoj të jetë një sektor shumë i rëndësishëm për ekonominë tonë lokale”, theksoi Filo.
Mijëra qytetarë dhe turistë kanë ndjekur aktivitetet e festivalit, i cili kulmoi me “Karnaval Party” në Pazarin e Vjetër, ku performoi këngëtarja e njohur Rezarta Smaja, duke mbyllur me muzikë dhe festë një mbrëmje të paharrueshme në zemër të Korçës.
“Energjia e Festivalit Ndërkombëtar të Karnavaleve, një festë e vërtetë në rrugët e Korçës” – shkruan Rama.
