Nesër, më 8 Korrik, zhvillohen si për “rastësi” gjyqësore dy seanca paralele: njëra në Gjykatën e Lartë dhe tjetra në Gjykatën e Fierit, ku dy të burgosurit VIP, Ervin Salianji dhe Erjon Veliaj, kërkojnë lirinë.
I pari kërkon lirinë me kusht pasi ka mbushur 2/3 e dënimit prej 1 viti me burgim, ndërsa Veliaj kërkon lirimin ose arrestin në shtëpi, për sa kohë do përfundojnë hetimet ndaj tij.
Njëri në burgun e Fierit dhe tjetri në burgun e Durrësit, presin të dalin nga qelitë ku janë, pasi kanë kaluar disa muaj në izolim.
A do lirohen?
Mundësitë më të mëdha për t’u liruar nga “burgu” i mbetur i ka Ervin Salianji, të cilit Drejtoria e Burgjeve dhe Shërbimi i Provës, të dyja në varësi të Ulsi Manjës, i kanë “qëndisur” një karakteristikë të mirë, që do i japë mundësi gjykatës të vendosë lirimin e tij për tre muajt e mbetur të shlyerjes së dënimit, të cilin mund ta bëjë edhe me kusht.
Ervin Salianji nuk ka asnjë faktor politik apo të sistemit të drejtësisë kundër lirimit, madje e kundërta është në favor të tij. Të gjithë janë në një konsensus të heshtur që Salianji të dalë, veçanërisht pas intervistës së dy ditëve më parë, të personazhit të njohur publik, Grida Duma.
E kundërta po ndodh me Erjon Veliajn, i cili ka një bateri të madhe kundërshtarësh mbi vete: media, prokurorë të SPAK, gjyqtarë të GJKKO, komplet Partinë Demokratike. Të gjithë po “luftojnë” kundër lirimit të tij, duke vendosur nën presion gjyqtarët që kanë në dorë verdiktin e ditës së nesërme për lirimin ose jo të tij.
Dy të burgosur, një protagonist
Si Ervin Salianji, ashtu dhe Erjon Veliaj, janë brezi i politikanëve të rinj që luftuan për trashëgiminë e partive respektive, PD dhe PS.
Të dy oratorë, të dy aktivistë me një ndikim të madh në elektoratet e djathta dhe të majta, të dy të gatshëm t’u hanë kokat liderëve tradicionalë të partive të tyre. Por të dy përfunduan në burg. Për koinçidencë, ose jo, tek të dy u avit si lak një emër: Fatmir Xhafaj.
Për Ervin Salianjin, çështja “Babale” prej disa vitesh mban një protagonist të vetëm, ish-ministrin e Brendshëm socialist, Xhafaj, i cili pasi ia arriti qëllimit të burgosjes së “hasmit” të tij, qau në një televizion kombëtar, si për të treguar se viktima e vërtetë ishte vetë ai.
Telenovela e papërfunduar “Babale” pritet të vazhdojë me një kthesë të re, me daljen nga burgu të Ervin Salianjit.
Për çështjen “Veliaj”, ish-ministri socialist duket si jashtë loje, por nga zërat brenda mazhorancës, ai edhe këtu del protagonist dhe me fije të shumfoshta lidhje.
Veliaj apo Salianji?
Që e marta do jetë një ditë me shumë nxehtësi jashtë dhe brenda dy sallave të gjyqit, kjo është e ditur që sot. Por që korriku dhe gushti do e mbajnë temperaturën mediatike në nivele 40 gradë, kjo do varet nga nesër.
Nëse do lirohet Veliaj dhe do mbesë në burg Salianji, i pari nuk e sfumon dot aksionin e të dytit edhe nga brenda burgut.
Nëse lirohet Salianji por jo Veliaj, përsëri temperatura do jetë e nxehtë. A do e pranonte dot Erjon Veliaj një vulosje disa vjeçare brenda në burg?
Ajo që pritet është lirimi i të dyve. Të dy jashtë qelive të burgut, do e bënin shumë më interesante këtë verë të nxehtë, me lajme dhe aksione të munguara gjithë këta muaj.
