Pas afro dy muajsh nga krijimi i qeverisë në Kosovë, në parlament, është mbajtur seanca e jashtëzakonshme ku kryeministri Albin Kurti prezantoi programin dhe prioritetet për katër vitet e ardhshme.
Kreu i ekzekutivit deklaroi para deputeteve se fokusi i qeverisjes së tij do të jetë përmirësimi i situatës së pandemisë, rimëkëmbja e ekonomisë si dhe dialogu me Serbinë. Kurti është shprehur i gatshëm të bashkëpunojë me krerët e opozitës për politikën e jashtme si dhe të punojnë për të përmirësuar gabimet e qeverive të kaluara.
“Le të synojmë të bashkohemi në temat që mund të gjejmë konsensus. Do të kërkojmë bashkëveprim me opozitën në temën e politikës së jashtme dhe dialogun me Serbinë. Mund të mos pajtohemi për shumë çështje, por të tentojmë të pajtohemi në dialogun me Serbinë.
Por mos të harrojmë ju që keni qenë në pushtet për këto 20 vjet keni bërë tashmë një trashëgimi që na ka ngelur neve dhe pjesa më e madhe e punës sime në dialog është në zhbërjen e dëmit që e keni bërë ju si asociacioni, fusnota, hapja e çështjes së statusit, kërcënimet për ndryshime territoriale.
Nëse i keni rënë pishman atëherë ejani të bisedojmë së bashku e t’i përmirësojmë.”, deklaroi Kurti!
Por programi i qeverisë për periudhën 2021-2025 nuk është pritur mirë nga opozita. Deputetet akuzuan kryeministrin se nuk ka asnjë plan konkret për zhvillimin e vendit.
“Programin që e keni para jush është program i cili nuk ka plan veprimi, nuk ka fare plan veprimi, objektivat nuk përkthehen në aktivitete konkrete, nuk ka afate kohore, nuk ka buxhet, nuk dihen as institucionet përgjegjëse të cilat do të duhej t’i zbatojnë këto objektiva. Kështu që ky është program më i dobët, më i kot dhe do mbahet mend për pasaktësinë aritmetike në vend të llogaritjeve reale, për paqartësinë kohore në vend të planeve konkrete, për përsëritje në vend të përmbajtjes”, deklaroi Enver Hoxhaj, kreu i PDK!
“Ky dokument 60 faqesh i përgatitur për 60 ditë, nuk ka as argument e as ide të fjalës. Për befasinë time e tonën, është një ndër dokumentet më sipërfaqësore e më jopërmbajtësore që kam lexuar ndonjëherë. E që mban titullin e programit qeverisës për katër vjet. Është një dokument që nuk përmban ndonjë masë, matje e ndonjë numër. Nuk përmban as kohë se kur do të nis dhe kur do të përfundojë një politikë qeveritare për katër vjet planifikim”, deklaroi kreu i LDK, Lumnior Abdixhiku
Ndersa Besnik Tahiri, kreu i grupit parlamentar te AAK, ka nenvizuar se “Ajo çka mund të konstatoj nga dokumenti i prezantuar sot nga kryeministri është se qeveria po na e shet një deklaratë politike si program qeverisës.
Programi në vend se të artikulojë caqe dhe synime specifike në funksion të cilave do të tregonte për masat, veprimet dhe indikatorët konkret ajo i ikë kësaj metode dhe na prezanton një rrëfim të dikastereve pa asnjë veprim dhe masë konkrete.
Kështu ikë edhe nga angazhimi edhe nga përgjegjësia që ka, pra flet për veprime pa caqe të matshme. Qeveria flet me hamendje për synimet anti-covid sikurse bënë edhe për rritjen ekonomike, kjo sepse nuk ka asnjë parashikim e mos të flasim fare qasje reale për këto sfida të mprehta”!
Gjithashtu nga partitë opozitare është kërkuar që qeveria të japë një pasqyrë të qartë për strategjinë që do të ndjekë Kosova sa i takon dialogut me Serbinë.
