Ish-kreu i Shërbimit Informativ Shtetëror, Fatos Klosi e konsideron zgjidhjen më të mirë dërgimin e çështjes së detit me Greqinë në Gjykatën Ndërkombëtare në Hagë.
Teksa ka komentuar një deklaratë të ministrit të Jashtëm grek Nikos Dendias, se Greqia do të zgjerohet me 12 milje në detin Jon, zoti Klosi kujton marrëveshjen e 2008-ës të rrëzuar nga Gjykata Kushtetuese në unanimitet, të cilën e cilëson të pështirë, ndërsa theksoi gjatë një prononcimi për gazetën “SOT” se me dërgimin e saj në Hagë u shmang nënshkrimi me ngut e nën presion i një marrëveshjeje kaq të rëndësishme e serioze që implikon drejtpërdrejt sovranitetin e autoritetin e shtetit shqiptar.
“Në fakt kjo deklaratë është bërë edhe më para nuk është se është hera e parë, ne 12 miljet i kemi prej shumë vitesh. Natyrisht problemi lind atëherë kur distanca mes dy vendesh është më e vogël se 24 si është midis Korfuzit dhe Sarandës dhe ky problem duhet zgjidhur. Problemi është për t’u diskutuar dhe mesa di unë qeveria jonë është munduar që këtë problem ta zgjidh në një gjykatë ndërkombëtare”, deklaroi ai.
Pakti i detit më 2008 që u rrëzua nga Kushtetuesja në 2009
Ndërkohë ish-kreu i SHISH, Fatos Klosi kujtoi marrëveshjen e 2008-ës të rrëzuar nga Gjykata Kushtetuese në unanimitet, të cilën e cilëson të gabuar. Mendoj se Haga do ta filloj nga fillimi problemin, se ca kemi thënë ne në vitin 2009, që natyrisht nuk e kemi thënë derisa gjykata Kushtetuese e konsideroi të gabuar dhe e hodhi poshtë se ajo marrëveshje u la në mes dhe ka nevojë për një tjetër.
Unë besoj se të dyja palët do t’i kërkojnë Hagës që me situatën që është në ngushticën e Korfuzit si do të ndahet, ku do kalojë vija e kufirit midis dy vendeve. Them se por këtë gjykatë nuk do jetë hera e parë që bëhet një kërkesë e tillë dhe ata njerëz që përbëjnë gjykatën do kenë eksperiencën e nevojshme dhe do konsultohen sigurisht me specialist të fushës.
Unë këtë e quaj një zgjidhje, duke qenë se këtu gjithmonë do ketë probleme edhe do diskutohet pafund një marrëveshje sikur të nënshkruhej mes dy vendeve. Qeveria do kishte opinionin e vet dhe opozita ka pasur gjithmonë opinion të kundërt me qeverinë dhe zgjedhja e këtij problemi është më i drejti”, u shpreh ai për gazetën “SOT”.
Më tej zoti Klosi komentoi edhe deklaratën e bëra nga ish-kryeministri Sali Berisha, i cili ka thënë se marrëveshja e detit me Greqinë e vitit 2009 është pakti më i mirë që është bërë nga ai dhe qeveria shqiptare.
“Pse, apo se e ka bërë ai. Fakti që kemi specialist që në vitin 2009 dolën dhe thanë nuk e pranojmë se është i gabuar nuk do të thotë se është më i miri. Dhe mendoj se specialistët nuk kishin asnjë arsye që ta hidhnin poshtë paktin. Kështu që si gjithmonë ai mburret dhe i bënë qejfin vetes, por kush e beson është tjetër gjë”, nënvizoi ish-kreu i SHISH, Fatos Klosi.
