Ministri i Brendshëm, Sandër Lleshaj, i ka shpallur “luftë” ish-kryeministrit Sali Berisha, duke paralajmëruar shumë shpejt përballjen e tij me drejtësinë. Lleshaj ka rindezur sot debatin me Berishën, duke e bërë atë përgjegjës të akteve të dhunës në protestën e opozitës.
– Sipas gjeneralit, Sali Berisha, por edhe krerët e tjerë të opozitës, Lulzim Basha e Monika Kryemadhi, mbështetur dhe nga Ilir Meta, do të përballen jo vetëm me akuzën e cënimit të rendit publik, edhe me akuzën e cënimit të rendit kushtetues.
“Sot po tentohet të rrëzohen institucionet e shtetit nga të njëjtët që dje i rrëzuan ato nga brenda, por s’kanë asnjë shans ta bëjnë sot, duke përdorur dhunën. Organizatorët e protestës do të përballen me ligjin.
Problemi është që protesta po zhvendoset nga një cënim i rendit publik në një cënim të rendit kushtetues, çka do të thotë se organizatorët mund të përballen me akuzën e cënimit të rendit kushtetues”, është shprehur Lleshaj.
Kujtojmë që përplasja mes Sandër Lleshajt dhe Sali Berishës ka nisur prej kohësh, por arriti kulmin në një seancë plenare, kur ministri vendosi t’iu përgjigjej akuzave të forta të ish-kryeministrit.
Berisha ka hedhur gjithmonë akuza të forta ndaj Lleshajt, që kur Edi Rama e propozoi në postin e ministrit të Brendshëm, por ky i fundit iu përgjigj shkurtër në Kuvend, duke i thënë se nuk i ka duart me gjak si ai.
Këtu, gjenerali kishte parasysh ngjarjet e rënda, që kanë tronditur Shqipërinë në këto vite demokraci, ku Berisha ka qenë në poste drejtuese, siç është tragjedia e Gërdecit dhe “21 Janari”.
Pas kësaj deklarate, Sandër Lleshaj hodhi një tjetër hap kundër Berishës, teksa urdhëroi policinë ta kallëzonin penalisht, si dhe nisi çmontimin e “Facebook-ut” të tij, pasi prej aty ish-kryeministri bën shumë denoncime të forta kundër qeverisë socialiste, një pjesë e të cilave rezultojnë të vërteta, por që ka edhe mashtrime.
Pas kësaj, ministri i Ramës ka paralajmëruar një tjetër lëvizje edhe më madhore kundër Berishës, përballjen e tij me drejtësinë.
