DEBAT I MARRË…
E nisa bisedën me pyetjet standart.
-Nga je? Si të quajnë? Sa vjeç.
-Nga Fieri. Ndërnënas. Xhovani. 33.
-Më thuaj shkurt: Pse ke ardhur tek Fiks Fare?
-Jam i marrë.
-Barabar. Unë i rroisur. Sëmundjen ma zbuloi gruaja. Po ty?
-Vet. Jetoj me prindrit. Godas mamanë. Të dy më njerrin nga shtëpia. Fle me delet. Shtyj babanë. Të dy me detyrojnë të fle përsëri me delet. Kam një vëlla. Nga sebepi im, mori arratinë. Emigrent në Greqi. Kam edhe një motër. Për të shpëtuar nga thojtë e mi, u bë prostitutë. Jeton motel më motel në Tiranë.
-Të ka parë doktori?
-Shkova në Fier. Doktor Agimi më degdisi në spitalin e të çmëndurve në Vlorë. Më pëlqeu vendi. Por nuk më pranoi doktoreshë Diana…Nuk kishte vende bosh. Demek janë shtuar shumë budallejtë.
-Ke menduar rrugëzgjidhje?
-Do vras doktoreshën.
-Avash. Avash. Të dalin dy probleme. Së pari. Disa vite më parë, vendosa të vras vjerrin. Ma kishte nxirë jetën. Por mbeti krim në tentativë. Nuk gjeta kobure. Së dyti. Në se ti më thua se do vrasësh doktoreshën, jam i detyruar te njoftoj policinë. Ndryshe quhem edhe unë bashkëpuntor në krim.
-Mos e bëj qejfin qeder. E kam njoftuar vetë policinë. Askush nuk e vuri ujin në zjarr.
-Je i martuar?
-Me tru eksiq, kush më jep nuse në fshat?!
-Fiks Fare ka bërë disa mblesëri. Vjet martuam Albanën me një burrë të shkarë nga Dibra. Unazat çifti i shkëmbeu në emisionin e Alban Dudushit. Pranon të të gjejmë një nuse?
-Po talle me mua?
-Kam një merak. Ti që rreh prindrit, mund të godasësh edhe nusen?
-Nuk bën vaki. Më ka treguar babai: “Isha i marrë. Më martuan. Më zbuti nusja me xhevairin që i kishte falur perëndia.” Unë e besoj babanë. Ditën është dem i tërbuar. Natën, në krevat, pulë e lagur?!…Të kaloj nga java, për të parë nusen?!
