Sali Berisha dhe kreu i Partisë së Lirisë, Ilir Meta duket se janë nën ankthin e burgut. Pas presioneve të ndërkombëtarëve, duket se SPAK ka nisur nga puna dhe çështja “CEZ-DIA” po i terrorizon. Të dy së fundmi me hapjen e dosjes kanë ndryshuar deklaratat e forta që bënë vite më parë. I pari që “e drodhi” ishte Berisha, pasi kur u pyet për thirrjen e Ilir Metës në SPAK e mori në mbrojtje aleatin e tij duke sulmuar prokurorinë.
Pas tij është dhe Meta. I pyetur gjatë një interviste televizive, kreu i PL, Ilir Meta e ka justifikuar aleatin e tij për akuzat në vitin 2015, duke u shprehur se Berisha lexonte atë çfarë i kishte thënë ish-kreu i PD, Lulzim Basha. Sipas Metës, kryeministri Edi Rama kishte stisur një deklaratë dhe përdori Bashën për ta shfaqur në publik. “E ka trumbetuar sepse ka dëgjuar se çfarë i ka thënë Luli në atë kohë, sepse në atë kohë, këtë histori, Rama e stisi në publik përmes Lulit.
I kishte thënë Lulit të lexonte një deklaratë, bazuar në një shkrim spekulativ të BIRN-it, i cili spekulonte emrin që kishte dalë një ish-kryeministër që e kishte përfituar nga kjo kompania transferta, i cili ishte një emër tjetër që dilte nga procesi dhe nga letrat, u përpoqën ta lidhnin me emrin tim”, theksoi ai. Pra të dy bënë kthesën e madhe të ngjarjes duke u përpjekur të fusin “në kurth” SPAK pasi të dy janë të përfshirë në skandalin e “CEZ-DIA”.
Seanca parlamentare e datës 23 shtator 2015
Në seancën parlamentare të datës 23 shtator 2015, ai deklaronte krejt të kundërtën. Berisha në mes të Parlamenti sulmonte Metën dhe i kërkonte atij dorëheqjen. “Ndaj, unë kërkoj këtu, duke mbështetur plotësisht kërkesën e mëparshme për dorëheqjen dhe kalimin për hetim të zotit Meta, hetim ndërkombëtar për çështjen e CEZ-it”, shprehej Berisha. Në të njëjtën linjë me të ishin dhe bashkëpunëtorët e tije dhe sot.
Një ndër ta ishte Keltis Kruja, i cili po ashtu kërkonte dorëheqjen e Metës. “Edi Rama dhe Ilir Meta janë sot nën akuzë për grabitjen e qindra milionë eurove në aferat tashmë të njohura të CEZ-it, por çmimi i energjisë për shqiptarët rritet dhe sigurisht, kush nuk ka mundësi ta paguajë, e dini vetë se çfarë i ndodh. Shyqyr që kemi hequr dënimin me vdekje”, shprehej ai. Në të njëjtën linjë ishte dhe Arben Ristani:
“Sot Rama dhe Meta, që drejtojnë këtë mazhorancë, kanë goditur në themelet e veta organizimin demokratik të Shqipërisë duke dërrmuar standardet zgjedhore, duke kthyer Shqipërinë së paku 10 vjet pas. Këta oligarkë pikërisht për shkak të babëzisë së tyre përdorin pushtetin për të bërë para dhe paratë për të ndenjur në pushtet”. Po ashtu opozita e asaj kohe akuzonte Metën se Kastriot Ismailaj pastronte paratë e tij. Në atë kohë Berisha vijonte ende të drejtonte PD, pavarësisht se kishte emëruar Bashën.
Disa nga akuzat tronditëse të Sali Berishës për Ilir Metën:
Dhjetor 1999
“Jeni vendosur në çatinë e botës për sa i përket korrupsionit. Unë nuk i besoj Dritëro Agollit kur thotë të gjithë jemi të përlyer, jam i bindur që në këtë grup parlamentar dhe kudo ka shumë të papërlyer dhe këtu…”.
Maj 2000
“Ju nuk e dini. Ka ndodhur e njëjta gjë si me floririn. Dhimitraq Rafti ka kthyer paratë nga Banka e Pireut të Greqisë dhe “lavatriçja Meta” ia ka pranuar ato, pasi i ka marrë nja 200 mijë. A doni dokumente të tjera?”.
Korrik 2000
“As me 30 ditë nuk përshkruhen bëmat dhe gjëmat tuaja. Unë detyrohem tani të ftoj shtypin që të bëj konferencë shtypi jashtë”.
Shtator 2000
“Ti Ilir Meta, do të më falni për shprehjen, që të kapin banditët në mal të Dajtit pa pantallona, ti Ilir Meta, që më 14 Shtator mbushe poturet, ti Ilir Meta, që herë flet si pulë, kurse gjetiu tund vithet si gjel mbi pe. Ti je ai që do të thuash më 2 Tetor, “mbathja Fatos se prapa të vjen Meta”.
Korrik 2000
“Ai e mori si çdo qeveri tjetër pasurinë për të vazhduar luftën, kurse ju vodhët thesarin, jo në vitin 1941, jo më 1939, por vodhët thesarin më 1999. Në dhjetor të vitit 1999 ju festuat Vitin e Ri duke u vjedhur thesarin shqiptarëve. Është e thjeshtë t’u thuash shqiptarëve se Leka Zogu mori thesarin, po edhe qeveria juaj e mori thesarin, dhe e mori atë më 28.12.1999, dhe e mori atë të tërin nga data 28 dhjetor deri në datën 22 prill”.
Nëntor 2000
“Dënoj si autorë kryesor të kësaj masakre kryeministrin terrorist Ilir Meta i cili dhunoi votën e gjysmë milioni shqiptarëve, feston ditën e flamurit me gjakun e adoleshentëve të Tropojës”.
Gusht 2001
“Mbi Ilir Metën dhe bashkëshorten e tij, rëndojnë dy varre dhe dy krime të fshehura pas Malit të Dajtit. Nuk do të jetë e largët dita kur Ilir Meta do ta mbylli jetën e tij pas hekurave të burgjeve…
Gusht 2001
“Për PD-në, Ilir Meta është njeriu që përfaqëson klanin më të rrezikshëm të trafiqeve në Shqipëri, të trafikut të drogës, të trafikut të fëmijëve dhe të trafikut të vajzave të mitura. Në historinë e vendit ky mbeti njeriu që me bandat e tij ngjiti Shqipërinë në krye të listës së vendeve të planetit në trafiqet e skllevërve të seksit, të fëmijëve, të drogës dhe të armëve. Ai është vrasësi dhe terroristi i opozitës, është njeriu që urdhëroi hedhjen e granatave mbi gjimnazistët në Tropojë.. Meta përfaqëson vrasësin e vërtetë të fjalës së lirë, është simbol i injorancës njerëzore, i tmerrit nga fjala e lirë”.
Mars 2015
“Mund të flasësh gjithë ditën për krimin dhe lidhjet tuaja me krimin. Je kokë e qelbur! Ajo kokë e qelbur që qëndron në krye të parlamentit, po kundërmon sot jo vetëm në Shqipëri, por në Evropë dhe në botë. Kjo alibi që kërkon, është e turpshme. Dorëheqjen e parë e dhe për bllokun e Monikës! Tani jep dorëheqjen e dytë! Për 700 mijë euro dhe dorëheqjen herën e parë”.
Mars 2015
“Të protestojmë kundër Ilir Metës, të akuzuarit me zë dhe figurë si porositës i vrasjes së dy deputetëve dhe që nuk jep dorëheqjen për t’i hapur rrugën hetimit. Pasnesër në ora 11:00 të gjithë në sheshin “Skënderbej” nën moton: të hedhim, të hedhim murin e krimit! T’i hedhim, t’i hedhim qelbësirat!”.
