Juristët njëzëri rrëzojnë presidentin Ilir Meta, duke deklaruar se kreu i shtetit nuk ka asnjë kompetencë për të shpërndarë Parlamentin. Gazeta “SOT” kontaktoi me disa juristë, të cilët ishin në unison me njëri-tjetrin, ku deklaruan se një gjë e tillë mund të ndodhë vetëm në raste të veçanta.
Avokat Spartak Ngjela u shpreh se presidenti Ilir Meta ka të drejtë të shpërndajë Parlamentin vetëm në momentin kur mazhoranca nuk ka shumicën e përfaqësimit, duke shtuar se në këto kushte ku jemi Meta nuk ka asnjë të drejtë për të bërë një veprim të tillë. Në reagimin e tij për gazetën, Ngjela tha se nëse presidenti vijon të ushtrojë veprime të tjera antikushtetuese atëherë ai do të përballet me drejtësinë. “Presidenti nuk ka asnjë kompetencë për të shpërndarë Parlamentin, zero. Do tallen ata dhe do fshijnë duart me letrat e presidentit. Kompetencat e presidentit fillojnë kur qeveria nuk ka shumicën dhe ia kërkojnë presidentit shpërndarjen e Parlamentit. Kur Parlamenti nuk zgjedh dot kryeministrin, vetëm këtu ka të drejtë, të gjitha veprimet e tjera antikushtetuese e çojnë në burgim të përjetshëm. Thirrjet e Metës janë abuzim me pushtetin, por atë nuk e përfill njeri se është veprim juridik absolutisht i pavlefshëm”, tha Ngjela për gazetën “SOT”.
Reagojnë Vishaj e Hazizaj
Por në të njëjtën linjë ishte edhe avokati Saimir Vishaj. I kontaktuar nga gazeta, Vishaj deklaroi se Meta e ka të pamundur të shpërndajë Parlamentin pa një vendim të mazhorancës, duke shtuar se presidenti ka të drejtë vetëm të legalizojë kontratën kushtetuese që mazhoranca ka me elektoratin e vet. Sipas tij, thirrjet e presidentit janë nul, duke hequr një paralele edhe me dekretin e Metës për mbajtjen e zgjedhjeve vendore në 13 tetor. “Nuk mund të shpërndahet Parlamenti pa një vendim të mazhorancës. Është mazhoranca ajo e cila ka një kontratë me elektoratin, ka një datë fillimi dhe një datë mbarimi. Presidenti vetëm legalizon këtë kontratë.
Nuk mundet të bëjë asgjë tjetër, sepse është njësoj si puna e zgjedhjeve lokale që dekretoi 13 tetorin, i cili ishte nul. Për mua jo nuk mund ta shpërndajë Parlamentin. Presidenti duhet të respektojë kontratën që ka mazhoranca dhe elektorati”, tha Vishaj. Edhe avokati Sokol Hazizaj mbajti të njëjtin qëndrim, duke deklaruar se presidenti Ilir Meta nuk ka kompetencë për të shpërndarë Parlamentin, duke shtuar se edhe Kuvendi duhet të respektojë Kushtetutën dhe të plotësojë kuorumin e 140 deputetëve. “Presidenti nuk ka asnjë kompetencë Kushtetuese për ta shpërndarë Parlamentin, por dhe Kuvendi në respekt të Kushtetutës nuk mund të vazhdojë kështu me 122 deputetë”, u shpreh Sokol Hazizaj për gazetën “SOT”.
Rrudhja e kompetencave
Por edhe juristi Genc Gjokutaj mbajti të njëjtin qëndrim, duke deklaruar se presidenti Ilir Meta nuk ka asnjë kompetencë kushtetuese për të shpërndarë Parlamentin. Në reagimin e tij për gazetën “SOT”, Gjokutaj deklaroi se me vendimin që mori mazhoranca për rrudhjen e kompetencave të Metës i ka hequr çdo të drejtë ligjore, duke shtuar se tani Meta ka fuqi vetëm për të dekretuar rektorët dhe gjeneralët e ushtarakët. “Nuk ka kompetencë presidenti të shpërndajë Parlamentin. Në bazë të kompetencave kushtetuese nuk mundet. E ka pasur këtë të drejtë, por me këto rrudhjet e kompetencave që i bënë presidentit ia hoqën, e kufizoi shumë.
Tani Meta vetëm titujt dhe gradat ka në dorë, letrat kredenciale, i dërgon letra Kuvendit, rektorët që ti dekretojë dhe gjeneralët e ushtarakët kaq ka të drejtë të bëjë. Në pjesën ligjvënëse kompetencat e presidenti nuk shtrihen më. Edhe atë debat të Metës e tha që nuk shprehem me dekret, por do e shpërndajë populli. Me këtë Meta la të kuptohet se është i zgjedhur i popullit e do ngrihen. Por se si do e shpërndajë mbetet për tu parë”, tha Gjokutaj për gazetën./Sot/ ELISJEDA KIKO
