Nga Carlo Bollino
Pasi anuloi zgjedhjet e 30 qershorit, sot presidenti Ilir Meta ka thirrur partitë politike për të negociuar një datë të re për zgjedhjet vendore. Një lëvizje tjeter e papritur, e cila dëshmon kaosin që ka krijuar dhe rrëmujën me të cilën po lëviz.
Në motivimet e dekretit të tij, që nga shumë ekspertë u gjykua si antikushtetues, Meta kishte shpjeguar se data e re do të caktohej vetem pas një marrëveshjeje mes partive për të dalë nga kriza.
Po çfarë kuptimi ka, atëhere, të flasësh për një datë të re sot, kur nuk ekziston ende asnjë marrëveshje për krizën? Vetëm dy ditë më parë, Lulzim Basha deklaroi se opozita nuk do të marrë pjesë në zgjedhje në asnjë datë, në rast se nuk jep më parë dorëheqjen kryeministri Edi Rama.
Është krejtësisht e qartë pra që, edhe sikur Meta të caktonte një datë të re për votimin, situata nuk do të ndryshonte nga 30 qershor, pasi Edi Ramës as nuk i shkon ndërmend fare të dorëhiqet.
Po si shpjegohet atëhere lëvizja e Ilir Metës? Me sa duket presidenti e ka kuptuar gafën që bëri. Kushtetuta i atribuon atij faktikisht vetëm të drejtën e caktimit të datës së zgjedhjeve, por jo atë që të heqë datën e caktuar tashmë. Në rast se, me dekretin e tij të ri të së hënës Meta do të kishte vendosur edhe një datë të re, ndoshta dekreti i tij do të ishte më i lehtë për t’u mbrojtur.
Por inati dhe nxitimi me të cilët veproi, e kanë shtyrë të fshijë vetëm datën e vjetër, pa vendosur një të re dhe kjo e bën nul aktin e tij. Konsultimet e vonuara, të thirrura për sot, për rrjedhojë kanë si qëllim të vetëm që t’i vendosin një arrnë gafës së tij kushtetuese dhe ai të marrë vendim sa më shpejt për një datë të re për zgjedhjet administrative, e cila ka mundësi të ishte në shtator.
Por konsultimet e Metës janë të destinuara të dështojnë pikërisht sepse janë të vonuara: në fakt PD-ja nuk do të japë asnjë datë pa dhënë dorëheqjen Edi Rama. PS nuk do të japë asnjë datë duke konsideruar se data 30 qershor është akoma e vlefshme. Pra konsultimet do të deshtojnë dhe Presidenti ose do të pranojë se është zënë ngushtë në një cep, ose do të fiksojë një datë të re duke vepruar përsëri sipas kokës së tij, sërish në shkelje të Kushtetutës.
Një lëvizje, e cila i shton kaos kaosit dhe që demaskon në mënyrë përfundimtare arsyen e vërtetë që ka shtyrë Ilir Metën të çdekretojë datën e 30 qershorit: të godasë Edi Ramën, duke i anuluar datën e 30 qershorit të cilën kryeministri e ka mbrojtur vazhdimisht; t’i japë një dorë opozitës në përpjekje ta bëjë të hyjë sërish në lojë pas vendimit veteravasës për të mos marrë pjesë në zgjedhje duke i dhuruar 61 bashki socialistëve; t’i rijapë rol Presidentit që në këtë krizë ishte gjithnjë inekzistent dhe të ndihmojë LSI-në e tij e të gruas së tij që të dalë nga humnera e padukshmërisë, në të cilën tashme ka rënë.
