Albin Kurti është emri i fundit “i preferuar” nga serbët për të drejtuar Kosovën. Por, përballë rezultatit të së dielës Beogradi ka filluar që të bëjë llogaritë dhe të njohë mundësinë që në të ardhmen i duhet të dialogojë me të, gjithmonë nëse dialogu do të rinisë.
Megjithatë, kreu i të ashtuquajturës “Zyra për Kosovën” në Qeverinë serbe, Marko Gjuriç thotë se Beogradi e ka një as nën mëngë për të “kontrolluar Qeverinë Kurti”. Asi nën mëngë, thotë ai është Lista Serbe. Kjo e fundit duket se ka siguruar dhjetë mandatet që i takojnë minoritetit serb dhe sipas parashikimeve të Kushtetutës së Kosovës duhet të përfaqësohet në Qeveri me një portofol ministri.
“Me këtë rezultat të Listës Serbe, kushdo që do të formojë qeverinë e re, për ta bërë këtë në mënyrë të ligjshme duhet ndalë terrorin e shtypjen ndaj serbëve dhe duhet të bisedojë seriozisht me Beogradin. Nuk mund të ketë institucione të legjitimuara në Prishtinë nëse ne jemi të bashkuar”, deklaroi ai për televizionin publik serb.
A nënkupton Marko Gjuriç me fjalinë e fundit se Lista Serbe mund të kushtëzojë pjesëmarrjen në Qeveri me emrin e Kryeministrit të ri? Për momentin është ende herët për të folur, por zyrtari serb përsëriti qëndrimin se Serbia nuk do ta njohë Kosovën pa përfituar diçka në këmbim.
“Kemi hasur vështirësi për të zhvilluar një dialog me këmbë në tokë dhe jo sipas mënyrës së disa liderëve separatistë në Prishtinë, që mendojnë se Serbia do të detyrohet të pranojë gjithçka pa marrë mbrapsht asgjë. Kjo nuk ka për të ndodhur”, tha ai.
Por, cili do të jetë qëndrimi i Albin Kurtit karshi serbëve në Kosovë dhe përballë Beogradit? Një sinjal për politikat e tij në këtë drejtim dhe sa i takon dialogut, kreu i Vetëvendosjes e ka dhënë në intervistën për gazetën austriake “Der Standard”, pak ditë para zgjedhjeve të së dielës.
Në këtë intervistë, Kurti thotë se serbët e Kosovës po përdoren nga Beogradi për qëllimet e këtij të fundit dhe se që në ditët e para të qeverisjes do të nisë një dialog në komunat me shumicë serbe për këtë çështje. Kurti zotohet se do të jetë Kryeministër edhe i qytetarëve serbë.
“Asnjë Kryeministër nuk e ka bërë këtë në të shkuarën, por është me mjaft rëndësi që të shohim se sa janë realizuar 33 marrëveshjet që kemi përmbyllur me Serbinë”, deklaroi ai.
Sa i takon dialogut, kreu i Vetëvendosjes ka shprehur pakënaqësi me Federica Mogherinin për drejtimin e tij, ndërsa sa i takon taksës për mallrat serbe shton se ajo do të hiqet.
“Do të zëvendësojmë taksat me parimin e reciprocitetit. Beogradit, si shembull, duhet të pranojë dhe njohë targat dhe dokumentacionet që lëshon Republika e Kosovës. Duam të sqarojmë fatin e të zhdukurve në luftë, pavarësisht kombësisë së tyre dhe për këtë duhet të ngrejmë ekipe të përbashkëta me Serbinë dhe ndërkombëtarët për të analizuar varret masive”, propozon kreu i VV.
Kurti mendon se Serbia duhet të dëmshpërblejë Kosovën për luftën dhe t’i rikthejë Prishtinës 1200 vepra historike dhe kulturore të grabitura prej andej. Lidhur me bashkimin me Shqipërinë, Albin Kurti nuk ka hequr dorë, por thotë se në një periudhë të afatshkurtër kjo është e pamundur. Rruga që ky bashkim duhet të ndodhë, kreu i Vetëvendosjes thekson se duhet të jetë vetëm paqësore dhe se për këtë duhet të vendosin qytetarët me referendum.
“Aktualisht Kushtetuta e ndalon një referendum të tillë dhe unë do ta respektoj Kushtetutën, deri kur të jemi në gjendje që ta ndryshojmë këtë pikë përmes një procesi demokratik. Kjo nuk ka për të ndodhur shpejt”, deklaroi ai për gazetën austriake.
