Lobisti amerikan Nicolas Muzin, dëshmia e të cilit cilësohet si “thembra e Akilit” për hetimin që po zhvillon prokuroria shqiptare ndaj kreut të PD, Lulzim Basha për lobimin rus në SHBA, ka kërkuar garanci nëse është në hetim dhe nëse do të jetë ndonjëherë në hetim nga autoritetet shqiptare para se të japë dëshminë e tij për këtë çështje.
Realstory.al ka zbuluar se garancia e drejtësisë shqiptare për të marrë dëshminë e vyer ka qenë edhe shkaku i shtyrjes së hetimeve për zyrtarët e PD, që tashmë janë njohur me akuzën nga ana e prokurorisë.
Në vendimin e treshes së prokurorëve Kolë Hysenaj, Gjergji Tako dhe Ervin Karanxha të siguruar nga Realstory.al, që është marrë më 12 shtator për shtyrjen e hetimeve me tre muaj (12 dhjetor), deklarohet se është pikërisht pritja e përgjigjes së SHBA për dëshminë e Nicolas Muzin, pasi t’i dërgohet përgjigja e organit të akuzës shqiptare mbi pyetjet që ka ngritur Muzin.
Sipas prokurorisë, në letërporosinë e dërguar fillimisht në SHBA, nga autoritetet e drejtësisë amerikane janë kërkuar dy pika, ku njëra lidhej me ligjërimin procedural të dokumenteve të marra nga faqja zyrtare FARA (e Foreign Agents Registration Act), ndërsa tjetra për pyetjen e shtetasit amerikan Nikolas Muzin, për të marrë prej tij panoramën e potë të ngjarjeve që e lidhin atë me Partinë Demokratike dhe me z. Lulzim Basha si dhe për të kuptuar se për çfarë arsyesh ai shprehet se ka marrë drejtpërdrejt 525 000 dollarë nga PD dhe pse shprehet se edhe 150 mijë dollarë të Biniatta Trade janë shpenzuar për llogari të Partisë Demokratike të Shqipërisë.
“Pika e parë është kryer dhe ka ardhur përgjigje e pjesshme nga autoritetet e SHBA. Për pikën e dytë kanë vijuar kontaktet me autoritetet amerikane të drejtësisë të ngarkuara me këtë letërporosi”, shprehet prokuroria në vendimin e saj, duke shpjeguar se pas momentit procedural të njoftimit të akuzës tek të tre të pandehurit, nga autoritetet përkatëse në SHBA kanë ardhur dy emaile, të cilat kanë përmbajtje me rëndësi juridike.
Pikërisht sipas këtyre emaileve, Muzin ka kërkuar informacion më tepër mbi mundësinë e hetimit ndaj tij. “Në emailin e parë, datë 19 korrik 2019 të autoriteteve të drejtësisë amerikane, parashtrohet fakti se shtetasi amerikan Nicolas Muzin ka kërkuar të ushtrojë të drejtën sipas nenit 5 të Kushtetutës së SHBA për të mos u vetë inkriminuar dhe autoritetet amerikane të drejtësisë po kryejnë konfirmimin te Nicolas Muzin se nuk do të procedohet në SHBA për hetimin shqiptar.
Gjithashtu, autoritetet amerikane të drejtësisë kërkojnë që të bëhet e qartë nga drejtësia shqiptare, nëse statusi i Nocals Muzin është si dëshmitar apo objektiv i mundshëm i hetimit dhe nëse Nicolas Muzin ka apo jo të drejtë të refuzojë të dëshmojë sipas ligjit shqiptar”, shprehet prokuroria për përgjigjen e SHBA.
Pas kësaj, prokuroria shqiptare ka dërguar përgjigje se ai nuk është në hetim për këtë çështje. Megjithatë, kjo nuk e ka bindur ende lobistin Muzin për të dhënë dëshminë, kështu që autoritetet amerikane kanë kërkuar të dinë dhe më tepër.
“Në emailin e datës 31 korrik 2019, konfirmohet se SHBA dhe autoritetet e saj gjyqësore nuk do ta procedojnë penalisht Nicloas Muzin për hetimin shqiptar dhe për rrjedhojë do të vijojnë përpjekjet për të pyetur pas dhënies së kësaj garancie. Por autoritete amerikane kërkojnë edhe qëndrimin e autoriteteve të drejtësisë shqiptare për statusin e Nikolas Muzin dhe për faktin nëse do të jetë objektiv i mundshëm i hetimit apo jo”, ka kërkuar SHBA për prokurorinë shqiptare.
Në këto kushte, ku vihet re se Muzin kërkon garanci edhe nga autoritetet shqiptare, ashtu si autoritetet amerikane, prokuroria ka vendosur që afatet e hetimit të shtyhen për të plotësuar kërkesat e autoriteteve gjyqësore amerikane, me shpresën e marrjes së dëshmisë nga lobisti amerikan dhe të provojë dhe më shumë lobimin rus të Bashës në SHBA.
