Mazhoranca qeverisëse ka mbyllur ditën e djeshme paketën e ligjeve të reformës në drejtësi. Dje Kuvendi i Shqipërisë zhvilloi seancën e radhës plenare, ku u miratuan një disa marrëveshje dhe ligje, mes tyre ligji “Për shërbimin përmbarimor gjyqësor privat”.
Ky projektligj u miratua me 90 vota pro, ndërsa ra në sy ndihma që dhanë deputetët e rinj të opozitës, duke bashkuar votat me mazhorancën. Por ligji për përmbarimin gjyqësor privat, është ligji i fundit që kishte mbetur pa miratuar nga reforma në drejtësi, duke dëshmuar qartë se Parlamenti është i vendosur për të çuar deri në fund këtë reformë.
Kjo pasi, pas miratimit të ligjit në fjalë, hapet rruga për t’u amenduar edhe disa nga nenet të ligjit për KLGJ dhe KLP që ka rrëzuar Gjykata Kushtetuese, ç’ka është një paralajmërim se shumë shpejt do të ketë një furtunë në gjyqësor dhe politikë. Kështu, me miratimin e këtyre neneve, i hapet rruga Këshillit të Lartë Gjyqësor dhe Këshillit të Lartë të Prokurorisë për të marrë vendime, pasi deri më tani vendimmarrja e tyre ka qenë e cunguar.
Thënë më troç, duke parë këto ritme dhe një unifikim të plotë mes mazhorancës dhe opozitës, sidomos për ligje të rëndësishme, ngritja e organeve të mbetura të drejtësisë dhe tërmeti në radhët e politikë dhe gjyqësorit, janë çështje javësh.
Hysi: Fund praktikave abuzive
Ligjin “Për shërbimin përmbarimor gjyqësor privat” e komentoi edhe deputetja e PS, Vasilika Hysi. Nga foltorja e Kuvendit, Hysi deklaroi se me miratimin e këtij ligji, sipas saj, marrin fund praktikat abuzive për ekzekutimin e vendimeve gjyqësore. “Ligji “Për shërbimin përmbarimor gjyqësor privat” që miratojmë sot është ligji i fundit në kuadër të paketës së reformës në drejtësi.
Ky ligj i jep fund praktikave abuzive dhe neglizhencës për ekzekutimin e vendimeve gjyqësore, duke plotësuar kornizën e ligjeve të reformës në drejtësi. Shpesh shërbimi, etika dhe profesionalizmi i tyre lë shumë për të dëshiruar.
Të fitosh të drejtën me vendim gjyqësor nuk mjafton nëse mbetet në letër e nuk zbatohet dhe për këtë është përgjegjës shërbimi përmbarimor gjyqësor”, deklaroi ajo. Më tej, Hysi deklaroi se reforma në drejtësi është kryereforma e vendit, që do të çlirojë gjykatat nga influenca politike, ndërsa i quajti akuzat e opozitës ndaj reformës si dashakeqe.
Sipas saj, qytetarët shqiptarë do të gjejnë më shumë drejtësi në sistemin e ri. “Qytetarët shqiptarë për fat të keq për 30 vjet nuk kanë pasur një drejtësi të pavarur, por të kapur nga pushtetet. Kjo gjë duhet të marrë fund njëherë e mirë. Kjo arrihet përmes reformës në drejtësi. Kjo reformë, jetike për drejtësinë e shqiptarëve dhe për zhvillimin e Shqipërisë, pengohet dhe mbi të hidhet baltë”, nënvizoi Hysi.
Ngritja e Gjykatës Kushtetuese
Pjesë e diskutimeve për ligjin për përmbarimin gjyqësor privat ishte edhe deputeti i PS, Ulsi Manja. Nga foltorja e Kuvendit, Manja bëri një bilanc të reformës në drejtësi, ndërsa dha garanci se brenda muajit qershor do të ngrihet Gjykata Kushtetuese. “Opozita ka bërë dhe bën gjithçka mundet për të penguar zbatimin e saj, por nuk e ndalon dot edhe sikur të qëndrojë gjithë jetën rrugëve.
Brenda qershorit 2019, ne do të kemi të plotësuara vendet vakante në Gjykatën Kushtetuese, por edhe Inspektorin e Lartë të Drejtësisë. Me votimin e këtij projektligji sot, Kuvendi përmbyll përfundimisht me sukses miratimin e plotë të të gjitha ligjeve të paketës së reformës në drejtësi.
Bilanci i plotë i reformës në drejtësi që ka ndërmarrë kjo mazhorancë që kur erdhi në pushtet përfshin miratimin e 30 ligjeve dhe një vendimi të Kuvendit. Nga 30 ligjet e miratuara, 14 janë me shumicë të cilësuar. Në total kemi miratuar 2013 nene”, deklaroi deputeti Manja.