Humbja e zgjedhjeve të pjesshme në Himarë nga opozita dhe deklarata e ish-kryeministrit që nuk pranonte rezultatin, duke hedhur akuza për vjedhjen nga ana e mazhorancës, ka sjellë reagime të forta në rrjetet sociale edhe nga ndjekësit.
Sali Berisha është ‘masakruar’ me komentet e shumta edhe nga ndjekësit e tij në Facebook, pak pasi ish-kryeministri bëri fajtor Edi Ramën për humbjen e kandidatit të tij në Himarë.
Nuk mungojnë qytetarët që vënë para përgjegjësisë morale kreun e demokratëve, duke i kujtuar edhe përgjegjësitë politike, por edhe dyshimet për pazare politike me kundërshtarët.
“Z.Berisha, nuk patët turp kur shitët Shkodrën e Arben Brocit, Tropojën e Azem Hajdarit etj. Qënke indinjuar me humbjen në Himarë. Boll i morët në qafë demokratët e ndershëm që besojnë te Partia Demokratike…”, shkruan komentuesi në profilin e ish-kryeministrit dhe nuk ndalet këtu.
“…Shkurt e saktë, sa të jeni ju ish-komunistat, ti dhe Likja, PD është për të ardhur keq dhe më vjen keq për ata demokratë që duan PD, duan demokracinë dhe jo ish-komunista, ish-spiuna…”, vijon ndjekësi.
Kurse një tjetër komentues tregohet më i drejtpërdrejtë, duke e bërë përgjegjës dhe kujtuar se ish-kryeministrin nuk e do populli. Madje i përmend edhe pazarin e vulës.
“Një herë thuaj të vërtetën. Edi Rama fiton sepse ty s’të do populli o i pafytyrë, o mashtrues, ti çdo gjë e bëre të marrësh vulën, për të mbrojtur familjen…”, shkruan qytetari.
Një tjetër i kthehet edhe zgjedhjes së Fredi Belerit si kandidat në Himarë nga opozita vitin e kaluar, teksa fajëson Berishën se mbështeti një kriminel.
“Fredi Beleri duhet të ishte varur në mes të Tiranës dhe jo të kandidonte për kryetar bashkie. Turp të vijë ty dhe partisë tuaj që vendose të kandidosh me një spiun antishqiptar në trojet shqiptare. Shko qau te Mitsotaki dhe Vangjel Lesh-Dule tani, sepse ne në Shqipëri nuk duam spiuna dhe tradhtarë që shesin vendin e tyre”, shkruan ai.
Por ka edhe ata që i kalojnë caqet e etikës, duke e quajtur “kufomë”, “mashtrues”, “hajdut”, apo “kriminel”.
Teksa dikush i kujton edhe përfitimet që ka pasur, duke hedhur doza ironie. “Mos ndrysho, mos hap rrugë, se po hape, t’i morën të 19 pallatet që ka ndërtuar Gita te ish-kompleksi “Partizani”, bashkë me të tjerat që ke vjedhur me Zenin dhe Gitën”.
Socialistët fituan me diferencë të madhe zgjedhjet e Himarës, teksa kandidati i tyre Vangjel Tavo ka marrë 5022 vota përballë rivalit të tij, Petro Gjikuria, i cili ka marrë 3545 vota.
