Ditën e djeshme, Gjykata Administrative e Tiranës, në seancën gjyqsore me relatore gjyqtaren Nafije Hasko, mësohet se ka pranuar ankesën e parashtruar nga kompania tregtare me bazë në Zvicër, “Penzoil” Trading SA, kundër Ministrisë së Ekonomisë dhe Financave, për anulimin e vendimit të Komisionit Publik të Tenderave të Stacioneve të Shërbimit, ndaj qeveria është tërhequr nga koncesioni i pompave në stacionet e karburanteve.
Gjykata hodhi poshtë kërkesën për një masë paraprake për tenderin, pasi rezulton i pezulluar aktualisht. Arsyetimin për vendimin e marrë, gjykata do ta shpreh në ditët në vijim.
Madje edhe Komisioni i Prokurimit Publik ka pezulluar garën pasi kompani ndërkombëtare Penzoil Trading SA ka bërë ankesë dhe ka urdhëruar Ministrinë e Financave të pezullojë menjëherë tenderin dhe të vërë në dispozicion të Komisionit informacione shtesë për të gjitha pretendimet e ngritura nga kompania.
Kompania ndërkombëtare e cila aktualisht është aktive në derivatet e naftës, tregtinë e biokarburanteve dhe tregun e anijeve, mësohet se ka anuluar përmes gjykatës, një vendim të Komisionit dhe urdhëroi modifikimin e pjesshëm të kritereve të tenderit, pasi ishin në kundërshtim me ligjin mbi “parimin e konkurrencës së ndershme dhe mosdiskriminimit të konkurrentëve”.
Dhënia me koncesion e shërbimit të kolaudimit të pompave të karburanteve është kritikuar nga ekspertët, por edhe operatorët e karburanteve në treg. Ekspertë të fushës thonë se veç rritjes së çmimit të karburantit kjo mund të sjellë edhe dëmtim të konkurrencës në treg, duke mos përjashtuar marrëveshjet pjesore mes koncesionarit dhe operatorëve të karburanteve.
Aktualisht kontrolli i pompave në stacionet e karburanteve kryhet nga Drejtoria e Metrologjisë. Për këtë kompanitë e karburanteve paguajnë rreth 100 euro në vit për çdo pompë, që kanë në stacionet e tyre.
