Partia Demokratike dhe Lëvizja Socialiste për Integrim do të protestojnë sot për të tretën herë para Kryeministrisë, me qëllim rrëzimin e qeverisë dhe kryeministrin Edi Rama. Ndryshe nga protestat e 16 shkurtit dhe 16 marsit, ditën e sotme do të protestohet në orën 18:00, duke rritur më tej dyshimet se protesta mund të kalojë në skenarë dhune.
Sipas informacioneve, Policia e Shtetit ka indicie se në protestën e sotme elementë dhe kontigjentë të dhunshëm mund të shkaktojnë dhunë. Për këtë arsye policia është vendosur prej ditës së djeshme në gadishmëri dhe ka marrë një sërë masash për mbarëvajtjen e tubimit. Madje, ky plan masash vjen edhe se protesta e sotme starton në orën 18:00, por që nuk dihet përfundimi i saj.
Kështu, gazeta mësoi se për mbarëvajtjen e protestës do të angazhohen mbi 1500 efektivë policie, ndërsa tubimi do të monitorohet me dron. Po ashtu, mësohet se agjentë civilë, automjete të hedhjes së ujit si dhe Garda e Republikës do të jenë të angazhuara si plan i masave për të monitoruar dhe ndërhyrë në çdo moment nëse protesta e sotme e opozitës do të bëhet e dhunshme. Nga ana tjetër, në ndihmë të policisë do të jenë edhe kamerat e sigurisë rreth e rrotull Kryeministrisë, të cilat paraditen e djeshme janë pastruar për të pasur një fokusim të qartë të tubimit dhe identifikimin e protestuesve të dhunshëm.
Ndërkohë, mësohet se për të shmangur ngjitjen e protestuesve, shtyllat rreth e rrotull selisë së Këshillit të Ministrave janë lyer me graso, ndërsa është vendosur mbrojtësja te dera e jashtme e Kryeministrisë. Por ndryshe nga herët e tjera, përgjatë gjithë perimetrit të Kryeministrisë janë vendosur gardhe metalike, dhe jo rrjeta si herën e shkuar.
Po ashtu, pjesë e masave të policisë është edhe bllokimi i qarkullimit në rrugën “Ismail Qemali”, “Ibrahim Rugova” që lidhen me bulevardin, ura e Lanës nga Ministria e Brendshme deri tek Presidenca, aty ku do të ndalohet dhe parkimi i mjeteve. Madje, masat e shtuara të policisë u vunë re që dje në rrugët e Tiranës, ku në disa ministri dhe institucione të rëndësisë së veçantë, ishin dislokuar shumë efektivë policie dhe Gardës së Republikës.
Gjithsesi këto janë pregatitje të detyruara të policisë, sepse asgjë nuk do ndodhi vetëm se opozita vazhdon të tallet me militantët e saj të papunë duke u premtuar dhe duke i paguar 1 ditë punë, transportin dhe të ngrënët.
