Emigrantët shqiptarë që jetojnë dhe punojnë në Itali duhet ende të presin për të përfituar nga njohja e ndërsjellë e pensioneve.
Me gjithë “dritën jeshile” që marrëveshja e mori të mërkurën në Dhomën e Deputetëve në Parlamentin italian, zëvendësministrja e Ekonomisë Kulturës dhe Inovacionit, Olta Manjani tregon edhe hallkat e tjera që duhet të përmbyllen që të bëhet bashkimi i viteve të punës.
“Hapi pasardhës është ratifikimi nga ana e Senatit dhe më pas e gjithë marrëveshja do të dekretohet nga Presidenti e më pas marrëveshja hyn në fuqi. Ne shpresojmë që këto etapa të kalojnë sa më shpejt.
Patjetër që etapa më e rëndësishme ka qenë kalimi, miratimi i marrëveshjes në Dhomën e Deputetëve dhe mendojmë që brenda vitit 2025 do të përmbyllet i gjithë procesi edhe nga ana e palës italiane”, tha për A2 zëvendësministrja e MEKI, Olta Manjani.
Bashkë me Italinë, Greqia është shteti tjetër me numrin më të lartë të emigrantëve shqiptarë, mbi 670 mijë të tillë, ndjekur nga, Maqedonia e Veriut, Shtetet e Bashkuara të Amerikës apo Gjermania. Pas më shumë se tre dekadave pritje, lajme të mira vijnë edhe për emigrantët shqiptarë që jetojnë e punojnë në Greqi.
“Fakti që kanë pranuar në këto dy vitet e fundit që ne të zhvillojmë dy raunde bisedimesh, në Athinë dhe Tiranë është një shenjë pozitive dhe optimiste që an bën të mendojmë se ka një vullnet për t’u ulur dhe për të dakordësuar një marrëveshje të tillë. Megjithatë kuptohet se në rastin e Greqisë duhet edhe shumë vullnet politik pasi bëhet fjalë për një numër të madh shqiptarësh që jetojnë dhe punojnë aty”, shtoi Manjani.
Shqipëria ka aktualisht marrëveshje për njohjen e ndërsjellë të viteve të punës me rreth 20 shtete, 13 prej të cilave kanë hyrë në fuqi dhe zbatohen.
“Ndërkohë janë edhe tre marrëveshje të tjera të cilat janë ratifikuar nga Parlamenti shqiptar, ku përfshihen Mali i Zi dhe Rumania. Ndërkohë janë edhe dy vende të tjera, Polonia dh e Serbia me të cilat marrëveshjet janë dakordësuar dhe finalizuar e që pritet ratifikimi në parlamentet përkatëse. Ndërkohë në bisedime jemi edhe për fillimin e negociatave me 6 shtete të tjera”, sqaroi më tej zv/ministrja.
Rreth 62 mijë shqiptarëve që jetojnë dhe punojnë në Serbi do të përfitojnë së afërmi pension për kontributet e paguara në të dy shtetet. Nga marrëveshja mes qeverive në Tiranë dhe Beograd do të përfitojnë edhe 30 mijë qytetarë serb që jetojnë në Shqipëri.
