Në kampionatin anglez u luajt dje një nga derbet më të zjarrtë dhe më spektakolarë të këtij sezoni në Premier League. Bëhet fjalë për derbin e Mançesterit midis Sitit dhe Junajtid, që përfundoi me fitoren e “djajve të kuq” 2-1, në një duel të pazakontë për mënyrën se si u luajt e si përfundoi rezultati. Ndeshjen po e fitonte Siti deri dy minuta para fundit, por në dy minuta Junajtid e përmbysi, duke e fituar ndeshjen dhe mori një trepikësh me mjaft vlera për moralin e grupit dhe për vazhdimësinë e skuadrës nën drejtimin e trajnerit Amorim. Kurse Siti i Pep Guardiolës konfirmohet edhe një herë se ka probleme në mbrojtje, se fut ujë dhe është ekip i paqëndrueshëm dhe rezultati i djeshëm mund të ketë ndikim në vazhdimësinë e trajnerit katalanas në krye të skuadrës së “qytetarëve”. Sa i takon ndeshjes, ajo ishte emocionuese nga fillimi në fund, me të papritura dhe me një përmbysje të çmendur me gola.
Pra, Mançester Junajtid bëri rikthim dramatik për ta fituar derbin e qytetit ndaj Mançester Sitit. Ndeshja e së dielës përfundoi 2:1 në të mirë të Junajtid. Joshko Gvardiol kaloi në epërsi 1:0 kampionin aktual, me golin e minutës së 36-të. Junajtid golin e barazimit 1:1 e shënoi në minutën e 88-të. Bruno Fernandes ishte i saktë nga pika e bardhë. Penalltinë e siguroi Amad Diallo, që u ndal në zonë në mënyrë të palejuar. Ky futbollist e shënoi golin e fitores në minutën e 90-të. Pas një pasimi mjeshtëror, Diallo u lirua edhe më bukur në zonë dhe goditi saktë për 2:1. Ndeshja i takoi xhiros së 16-të të Premier League dhe konfirmoi krizën e thellë të Mançester Sitit. Skuadra e Pep Guardiolës tani është në vendin e pestë me 27 pikë. Mançester Junajtid renditet i 12-ti me 22 pikë. Për trajnerin e Mançester Junajtid, Ruben Amorim, ishte derbi i parë i qytetit.
Për ta përfunduar mund të thuhet se në këtë përballje të madhe, Mançester Junajtid ka bërë rikthim të pabesueshëm në derbin me Mançester Sitin. Ndërkohë, Amad Diallo padyshim është heroi i Junajtid në derbin e sotëm ndaj Mançester Sitit. Anësori nga Bregu i Fildishtë, shënoi golin e fitores ku “parabulloi” portierin e Sitit, Ederson në fund të kësaj ndeshje. Këto ishin fjalët e tij pas ndeshjes së sotme: “Dua të falënderoj Zotin për këtë sonte dhe tani, le të fokusohemi në ndeshjen e radhës”, u shpreh Diallo. Kujtojmë se Mançester Junajtid, me këtë fitore të rëndësishme ka shkuar në 22 pikë në vend të 12, kurse Siti mbetet në vend të pestë me 27 pikë. Kryesimin e mban Liverpuli me 36 pikë. / Nga Adriatik BALLA
