Kur vjen puna te politika dhe votat, vihet në punë çdo lloj diplomacie dhe inteligjence për të arritur tek çdo zgjedhës, pavarësisht kombësisë së tij.
Tabloidi gjerman BILD i ka kushtuar vëmendje fushatës që po bën politikani i SPD-së, Markus Schreiber. Ai, ndryshe nga shumë kolegë të tjerë, është fokusuar tek komuniteti shqiptar që jeton në Gjermani. Madje ka postuar disa video në TikTok, duke folur shqip.
“Kjo nuk ka ndodhur kurrë më parë, të paktën jo në Hamburg”, thuhet në shkrimin e BILD.
Sipas të njëjtave burime, brenda një kohe shumë të shkurtër, anëtari i këshillit të qytetit, ka marrë mbi 304 mijë pëlqime me postimin e tij të parë dhe mbi 161 mijë në të dytin.
BILD shkruan se ky është një rekord pasi normalisht shifra të tilla për politikanët lokalë nga Hamburgu.
Dhe në fakt Schreiber po përpiqet të tërheqë votuesit me origjinë shqiptare në zonën e tij elektorale, e cila shtrihet në jug të qytetit. Në total, janë rreth 9 mijë votues të mundshëm nga komuniteti shqiptar që mund të votojnë në zgjedhjet e ardhshme shtetërore më 2 shkurt.
“Po mësoj shqip”, thotë ai në videon e parë. Dhe pastaj shpjegon se çfarë do të thotë në shqip “mirupafshim” dhe “lamtumirë”. Ai tregon me duar edhe simbolin kombëtar shqiptar, “Shqiponjën dykrenare”.
Shifrat tregojnë se kjo është pritur mirë nga shqiptarët vendas që jetojnë në Hamburg dhe që lejohen të votojnë. Ligji për Hamburgun të lejon që edhe me 5 ose 6 mijë vota personale mund të zgjidhesh në parlament.
