Ashtu si Partia Demokratike edhe Partia Socialiste pritet të bëjë lëvizje të shumta në radhët e deputetëve aktualë socialistë. Ditën e djeshme kryeministri Edi Rama ka mbledhur në selinë rozë drejtuesit politikë të 12 qarqeve dhe krerët e shtabeve elektorale.
Gazeta ka mësuar se përveç raportimit mbi ecurinë e përgatitjes së partisë në kuadër të zgjedhjeve parlamentare të 25 prillit të vitit 2021, në fokus të takimit që zgjati më shumë se 1 orë ka qenë edhe ndarja e detajeve për pjesëmarrjen e anëtarësisë në vlerësimin e deputetëve nëpërmjet portalit “Deputeti që duam” dhe për performancën e punës së ministrave.
Burime të sigurta nga ky takim pohuan se kryeministri Rama është shfaqur tepër kritik me vartësit e tij, ndërsa ka paralajmëruar lënien jashtë listave të 30-40 për qind të deputetëve aktualë të Partisë Socialiste, për shkak se baza është shumë e pakënaqur me performancën e tyre.
Në këtë kontekst mësohet se Rama ua ka bërë të qartë 12 drejtuesve se ka pasur një lumë pjesëmarrësish nga anëtarësia në portal, ndërkohë që bie në sy fakti se për shumë deputetë dhe ministra ka pasur pakënaqësi, ndaj të cilëve mësohet se baza është shprehur se ata janë arrogantë, nuk janë aktivë në zonat e tyre elektorale dhe se nuk e meritojnë që të rikandidohen.
Kështu që i ndodhur përpara kësaj situate reale, mësohet se kryesocialisti Rama ka kërkuar angazhim nga të gjithë, pasi sikundër e theksuan burimet, rreth 1/3 e deputetëve të grupit parlamentar të PS rrezikojnë të mos rikandidohen. Pritet që shumë figura të njohura mbeten jashtë listës së 25 prillit.
Baza shumë e pakënaqur me deputetët
Por pakënaqësitë e shfaqura nga baza për deputetët dhe ministrat socialistë nuk janë arsyeja e vetme që rrezikon që një pjesë të tyre t’i lërë jashtë garës së zgjedhjeve parlamentare të 25 prillit.
Sipas informacioneve, mësohet se kryeministri Edi Rama është shprehur para vartësve të tij në takimin e djeshëm se edhe në portali ka shumë aplikim të qytetarëve që kërkojnë t’i bashkohen Partisë Socialiste dhe madje të kandidojnë nën siglën e kësaj partie për deputetët në zgjedhjet e ardhshme të përgjithshme.
Kështu që nisur nga ky bum aplikimesh dhe të interesuarish, por edhe për faktin se kryeministri Rama ka shfaqur ambicien për një mandatat të tretë qeverisë, këta emra të rinj pritet që të shihen me prioritet dhe të marrin shumë vëmendje nga strukturat e PS.
Pra, kjo do të thotë se fakti që Rama po vë theksin që deputetët dhe ministrat të jenë tepër aktivë, e madje duhet të gëzojnë shumë mbështetje nga baza, është një sinjal se ka “dritë jeshile” në fund të tunelit edhe për t’u hapur rrugë prurjeve të reja në parti, për shkak se këto zgjedhjeve janë mjaft të rëndësishme dhe se Partisë Socialiste i duhen figura të reja, të papërlyera dhe që gëzojnë simpatinë e bazës.
Nga ana tjetër, gazeta ka mësuar se shefi i qeverisë është treguar mjaft i ashpër me vartësit e tij, të cilët i ka shkundur, ndërsa iu ka kërkuar që të punojnë më shumë dhe të zbresin në bazë, duke rritur kontaktet me strukturat dhe qytetarët.
Po ashtu mësohet se Rama ka akuzuar koordinatorët dhe deputetët socialistë se janë në gjumë, ndërsa është shprehur se ai ka dijeni për punën e gjithsecilit nga deputetët dhe se është i pakënaqur me ta, duke iu bërë të qartë se ai ka raport për ta edhe nga krerët e Partisë Socialiste të të gjitha degëve të vendit.
Ndërkohë, faktin se ka një bum aplikimesh e pjesëmarrjesh të anëtarësisë në vlerësimin e deputetëve nëpërmjet portalit “Deputeti që duam” dhe për performancën e punës së ministrave e konfirmoi dje edhe kreu i PS Fier, Petro Koçi përmes një statusi në rrjetet sociale. “Vazhdon referendumi socialist për vlerësimin e deputetëve dhe ministrave të qeverisë prej anëtarësisë”, shkruan Koçi.