Zëvendëskryeministri Erjon Braçe ka reaguar dje për një akuzë të ngritur në media ndaj tij, lidhur me grevën që kanë nisur punonjësit e ARMO-s në Poçem, ku thekson se ARMO-n, Sali Berisha e ka shitur. Braçe ka hedhur sulme edhe ndaj medias online që e ka shpërndarë lajmin.
Sipas këtij lajmi, Braçe i kishte mbyllur telefononin njërit prej punëtorëve protestues në Poçem. Por sakaq ai pretendon të kundërtën. “Sot, dita ime nisi me lajmin e një portali këllirë, gjobëvënës recidivist, sipas të cilit unë i kisha mbyllur telefonin punëtorëve grevistë në Poçem. Në fakt, e vërteta është krejt ndryshe. Një ditë me parë, në mesditë, kam marrë një thirrje që sipas telefonit tim, zgjati 4 sekonda. Unë ja hap kujtdo telefonin, në çdo kohë, i përgjigjem gjithkujt në tel, në mesazhe, në Whatsapp, në Instagram etj., madje më shajnë përse e bëj këtë. Pra, 4 sekonda, kam dëgjuar një “alo” dhe “Erjon Braçe je”;
Kur unë nisa te them “alo” sinjali u ndërpre, telefonova atë numër- e provuar nga telefoni im-, dhe thirrja nuk mbërrinte. Kaq! Çdo këllirë nga ai portal të vijë e ta verifikojë në telefonin tim”, tha Braçe. Pak ditë më parë kryedemokrati Lulzim Basha shkoi për vizitë tek punëtorët në Poçem. Kështu, Braçe shprehet se kur kishte parë që Basha kishte qenë aty, e kupto se pse kishte sulme ndaj tij. “Por ama, kur pashë Lyrëzim Bashën në Poçem, e kuptova pse duhet të baltosesha unë. Tani, për punëtorët në grevë dua të them ca te vërteta e të jap mendimin tim; 1. Punëtorët e nënstacionit të Poçemit janë peng i privatizimit të ARMO-s nga babai i Lyrëzim Bashës. Pra, ARMO-n, Sali Berisha e ka shitur me gjithë nënstacion edhe pse ai furnizon përtej ARMO-s, me gjithë punëtorë, duke e bërë nënstacionin dhe juve, pronë të Rezear Taçit në fillim, bankës huadhënëse më pas dhe në përdorim të çdo palaçoje që merr me qira ARMO-n kohë pas kohe”, tha Braçe.
Më tej ai ka theksuar se privatizimi i ARMO ka qenë kriminal ndaj duhet hetuar nga prokuroria kundër korrupsionit në gjerësi. “Privatizimi i ARMO ka qenë kriminal ndaj duhet hetuar nga prokuroria kundër korrupsionit në gjerësi, duke i përfshirë të gjithë, shitësit në qeveri, blerësin, bankat, përfshi ish-guvernatorin e Bankës së Shqipërisë, përmbaruesit, qiramarrësit të gjithë; Kontrata e privatizimit te ARMO-s, detyrimet financiare të saj, aksionet e shtetit dhe vlera e tyre e administruar nga kompania, paratë e marra, duhen analizuar një me një dhe cent më cent”, tha Braçe.
