Ish-truproja i ish-kryeministrit Sali Berisha, Sali Lushaj, ka replikuar me avokat Idajet Beqirin, sa i takon procesit gjyqësor të Izet Haxhisë dhe vrasjes së Azem Hajdarit.
Në një shkrim të publikuar nga gazeta “SOT”, Idajet Beqiri ndër të tjera përmend dhe Sali Lushën, por ky i fundit i ka përgënjeshtruar qëndrimet e avokatit. Përmes një reagimi për gazetën, Lushaj ka dhënë versionin e tij mbi ngjarjet e 12 shtatorit 1998. Sipas tij, nuk është e vërtetë që Hajdari ka qenë i armatosur dhe po ashtu i ka thënë atij që të merrte një kallashnikov.
“Përgënjeshtroj fjalët e thëna në artikullin e gazetës SOT të Av.Idajet Beqiri. Ju rri ashtu siç kam thënë në prokurori e gjykatë. Kam pasur oferta nga prokurorja norvegjeze Syri Frigard që të shkoja në vende nordike, por s’kam pranuar. Kam thënë vetëm të vërtetën e vetëm të vërtetën pa mu trembur aspak qerpiku. Nuk është aspak e vërtetë që Azem Hajdari të jetë takuar me zotin Berisha para se të dilte përjashta, por vetëm me mua. Kurrë s’më ka thënë merr një automatik ose të ketë pasur pistoletë me silenciator.
Zoti Berisha nuk më ka thirrur në zyrë, por shkova unë dhe i tregova çdo gjë mbi vrasësit dhe në bazë të thënieve të mia të vërteta, mbasi më ka thënë disa herë a është e sigurt që këta janë, i kam thënë po këta janë. Ndërsa për Mentor Dajën as nuk e njoh, as nuk kam asnjë dijeni”, ka deklaruar Sali Lushaj.
Më tej ai ka folur edhe për procesin gjyqësor ndaj Izet Haxhisë, ku ai u thirr si dëshmitar bashkë me mbesën e ish-kryeministrit Berisha. “Mbesa e zotit Berisha e thirrur në gjykatë në fillim të muajit korrik bashkë me mua, nuk ishte aspak në dijeni të asgjëje ku ua tha në sy çdo trillim.
Kurrë nuk kam pohuar në gjykatë që Azem Hajdari të ketë marrë në telefon një Jovanoviç e ta ketë pyetur a kanë ardhur ata miqtë nga Tropoja. Zoti Beqir po pate gjë drejtoju gjykatës për përgënjeshtrimin tim ndaj teje”, është shprehur Sali Lushaj.
Vrasja e Hajdarit
Deputeti i Partisë Demokratike, Azem Hajdari, u ekzekutua mbrëmjen e 12 shtatorit 1998, pak metra larg selisë së PD-së në kryeqytet. Nga breshëritë e plumbave gjeti vdekjen dhe truproja i tij, Besim Cera nga Dibra. Për vrasjen e ish-liderit të dhjetorit u akuzuan Jaho Mulosmani si dhe tre vëllezërit, Izet, Ismet dhe Isamedin Haxhia, njerëz që qëndronin shumë pranë kryeministrit Berisha dhe mbanin poste të rëndësishme.
Në një proces gjyqësor maratonë u cilësuan fajtorë Mulosmani, i cili u dënua përjetë si dhe dy vëllezërit Izet e Ismet Haxhia, që u dënuan përkatësisht me 25 dhe 20 vitet heqje lirie. I treti i vëllezërve Haxhia, Isamedini u dënua vetëm për armëmbajtje pa leje. Edhe pse dosja u mbyll me ndëshkimin e tre personave, asnjëherë nuk u tha motivi përse u ekzekutua Azem Hajdari.
Izet Haxhia u arratis më pas drejt Turqisë ku qëndroi për shumë vite. Në vitin 2018 ai u ekstradua nga Turqia dhe ndaj tij procesi gjyqësor rinisi nga e para, pasi nuk ishte njohur me vendimin. Prej viti 2018 procesi vijon, teksa ndodhet në fazën e dëshmive.
