Shqipëria po kalon një nga momentet e saj më të vështira përsa i përket koronavirusit, me qindra raste të reja të të prekurve nga Covid dhe numri i pacientëve që humbin jetën po rritet çdo ditë.
Por, disa me sa duket kanë kohë të tallen me shëndetin e shqiptarëve dhe këtë e bëjnë më së miri duke përdorur pikën e tyre të dobët, paranë, por edhe duke shfrytëzuar ligësisht miqësinë e tyre me pushtetin, i cili abuzimet e “dorovitësve” të tyre nuk i sheh e dëgjon.
Mjafton për të parë pamjet e siguruara nga tubimet e djeshme në këtë qendër tregtare, për të mbushur me gjoba “TEG” dhe rimëkëmbur arkën e shtetit me abuzuesit e ligjit.
Në këtë situatë kritike për shkak të koronavirusit, ku ekspertët ulërasin për rritjen e masave dhe për rrezikun që u kanoset shqiptarëve, pamje të tilla padyshim duhet të evitoheshin, e meqënëse drejtuesit e qendrës tregtare nuk u pëlqen të zbatojnë rregullat, atëherë duhet të vendoset rregull me gjoba të majme që të tilla situata të mos përsëritet më.
Vetëm pak ditë më parë, Kominteti i Ekspertëve, u shpreh se nuk do të lejonte grumbullimet masive të njerëzve më shumë se 10 vetë, e të parët që e pësuan publikisht marrjen e këtij vendimi, ishte aktori Bes Kallaku dhe të ftuarit e datëlindjes së tij, ku nuk mungonte Presidenti Ilir Meta dhe gruaja e tij Monika Kryemadhi, të cilët u gjobitën me 100 mijë lekë, të paktën siç u tha. Ndërsa pronari i lokalit ku u organizua festa e ndaluar, u gjobit me 10 milion lekë.
Rasti i djeshëm është edhe më skandaloz, pasi aktorin qëndronte në një restorant me familjarët e tij dhe miq, të distancuar me njëri tjetrin në një ambjent të prenotuar totalisht prej tij.
Ndërsa në qendrën tregtare asnjë ekspert në botë nuk mund të jet në gjendje të gjurmojë “Pacientin TEG”, që me shumë mundësi do të infektoi me qindra e mijëra të tjerë, pse do të blinte një bluze me ulje tek “TEG”, të një marke që është me ulje gjatë gjithë vitit.
Por nga këto pamje, asnjë ekspert nuk do mund të gjej nesër kush është “Pacienti TEG”, që të shkëpus zinxhirin e infektimeve për të mos marrë me dhjetra jetë të tjera. Sepse “Pacienti TEG”, është edhe më i rrezikshëm se tërmeti i 26 Nëntorit, pasi mund të marrë me forcën e tij shkatërruese edhe më shumë jetë.
Me dhjetra e qindra të pafajshëm do të vdesin nga makutëria e një biznesmeni të papërgjegjshëm, i cili ditën hiqet si filantrop e mbrëmjeve si “doktor vdekja”. Me dhjetra e qindra mund të vdesin, sepse masat e marra u shpërfillën në mënyrën më të shëmtuar e publikisht në sy të të gjithëve, biznesmenëve të tjerë, qytetarëve të përgjegjshëm, shtetit e autoritetëve përgjegjëse.
Pamjet e siguruara nga ekskluzive.al janë shqetësuese, sidomos kur shihet qartë, se si dhjetra persona mbahen “peng” para derës së një prej dyqaneve të qendrës tregtare. Në këtë video shihet qartë se si hapet dera elektrike e dyqanit e mbajtur qëllimisht mbyllur për të grumbulluar masivisht njerëz përpara tij, që punonjësja të filmoj skenën nga brenda. Ndërsa jashtë, nuk ndodhet asnjë punonjës për të siguruar distancimin social.
Siç shihet nga pamjet, dhjetëra e qindra persona të ngjitur me njëri-tjetrin presin të hap dyert dyqani dhe një pjesë e mirë e tyre nuk kanë vendosur as maskë, e cila është bërë e detyrueshme prej muajsh për biznese të këtij lloji./Ekskluzive.al
