Gjykata e Posaçme e Apelit i ka hapur rrugë gjykimit të ish-kryeprokurorit Adriatik Llalla. SPAK mbylli hetimet për të dhe e dërgoi dosjen në gjykatë, e cila e pranoi dhe vendoi që ajo të kalojë për gjykim. Por çështja ka shkuar në Gjykatën e Apelit, pasi Shkalla e Parë i hoqi sekuestron preventive pasurive të Llallës.
Dje Apeli i Posaçëm ka vendosur të rrëzojë Shkallën e Parë mbi pasuritë, duke kërkuar që ato të rivendosen në sekuestro. Nga ana tjetër e ka cilësuar si të drejtë dërgimin e dosjes për gjykim. Me këtë vendim të Apelit, tashmë hapet rrugëtimi i gjykimit të Adriatik Llallës për fshehje të pasurisë, ndërkohë pronat e tij do të vihen në sekuestro për herën e tretë. Ky vendim vjen pas mesazheve të qarta që lëshoi ambasada e SHBA, duke bërë që gjykata të reflektojë.
Sekuestrimi i pronave
Hetimet ndaj Llallës u konkretizuan nga ish-Prokuroria e Krimeve të Rënda. Në vitin 2018 kjo prokurori vendoi që të sekuestrojë pronat e ish-kryeprokurorit, pasi në atë kohë dyshohej se ato ishin përdorur në një skemë pastrimi parash. Llalla blinte toka me çmim shumë të lirë dhe në harkun e një kohe të shkurtër i shiste me çmim shumë më të lartë.
Pas shkrirjes së kësaj prokurorie frenat i mori në dorë SPAK, i cili mbylli hetimet dhe dërgoi dosjen në gjykatë për akuzën e fshehjes së pasurisë. Gjykata pranoi dosjen, por hoqi sekuestron e pronave. Kjo solli një reagim shumë të ashpër të ambasadores amerikane Yuri Kim. Kjo fundit e bëri të qartë se për SHBA, Llalla vijon të mbetet në listën e të korruptuarve dhe se nuk mund të shkelë në tokën amerikane.
Pas kësaj SPAK vendosi të hapë një dosje të re, duke vënë në lojë ligjin anti-mafia. Përmes këtij ligji iu sekuestruan pronat Llallës, por që nuk kishte lidhje me dosjen hetimore që shkoi në gjykatë. Ndërkohë dje Apeli ka urdhëruar sërish sekuestrimin e pronave duke i dhënë një goditje të fortë ish-kryeprokurorit.
Mbrojtja e Llallës
Adriatik Llalla do të mbahet mend si Kryeprokurori që mbylli dosjet më të mëdha të korrupsionit në vend. Për sa kohë ai ishte në krye të organit të akuzës, pati padi për shumë njerëz me pushet, por asnjë dosje nuk shkoi në gjykatë, si për njerëz të PD, ashtu dhe për ata të PS. Llalla u vu në krye të prokurorisë me bekimin e Sali Berishës, ndërsa më pas mori dhe aprovimin e Ilir Metës.
Madje ky i fundit u bë sebep dhe për sherrin që nisi mes Adriatik Llallës dhe ish-ambasadorit Donald Lu. Ambasadori akuzoi Llallën për manipulime me listat për KED. Ndërsa Meta mori në mbrojtje në atë kohë ish-kryeprokurorin. “Prokurori i Përgjithshëm ka kryer përgjigje zyrtare, duke sqaruar se asnjë kandidat tjetër përveç tre emrave të dërguar nuk plotëson kriteret e vendosura nga Kuvendi për anëtarët e Këshillit të Lartë të Prokurorisë që do të përbehet nga 9 anëtarë”, tha Meta.
Në mbrojtje të tij ka dalë edhe ish-kryeministri Sali Berisha. Madje kur plasi skandali, doli që ambasadorët e SHBA-BE i kishin kërkuar Llallës që të arrestoheshin Meta me Berishën, ndërsa ky i fundit kishte lajmëruar menjëherë këta të fundit. Fakti që amerikanët nuk e duan Llallën duket se është mesazh për shumë të tjerë.
