Në Shqipëri trarët e shtëpisë ende qajnë kur lindin vajza. Mbrëmjen e sotme në emisionin “Exclusive” u tregua me zë dhe me figurë se si në vendin tonë “vrasja e vajzave” ende ekziston.
Rastet e nënave shqiptare që detyrohen të kryejnë abort vetëm sepse në bark mbajnë vajzë janë të shumta, madje një studim i kryer nga shoqata “Together For Life” tregon se aborti selektiv në vendin tonë arrin shifra të frikshme.
Sipas këtij studimi rezulton se që prej vitit 1990 në vendin tonë mungojnë rreth 33 mijë vajza dhe se në Ballkan ne mbajmë vendin e parë për abortin selektiv duke u renditur pas Maqedonisë.
“Kryesisht këto aborte kryhen në tremujorin e dytë të shtatzënisë sepse atëherë dallohet më mirë gjinia e fëmijës. Është një vendim familjar sigurisht,” tregon Rubena Moisiu, mjeke gjinekologe në maternitetin “Koço Gliozheni” në Tiranë.
Abortet selektive kryesisht kryhen fshehurazi nëpër klinika private, por edhe në spitale shtetërore në rastet kur nënat sigurojnë në rrugë të jashtëligjshme raporte mjekësore në të cilat paraqiten me sëmundje të rënda.
“Aborti u bë atëherë kur u konstatua gjinia, që ishte vajzë. Në mos gaboj isha katër muajshe, e kam hequr me dhunë. Të heqësh një fëmijë, është të rrezikosh jetën tënde në radhë të parë. U detyrova të rregulloja një raport mjekësor që të hiqja fëmijën.
Nëpërmjet një mjeku të përcaktohet diagnoza që je me problem në zemër, je me probleme të tjera, nuk ta mban mitra, ndërkohë që unë nuk kisha asnjë nga këto. Sajova një gënjeshtër.
Burri (gjatë kësaj kohe) u largua, u ftoh nga unë se unë i thoja nuk dua ta heq ai…por u detyrova, u detyrova dhe i lutesha zotit të ma falte,” rrëfen një grua.
“Shkuam e kontrolluam e pamë që ishte vajzë dhe vendosëm me burrin që ta hiqnim, meqë ishte katërta vajzë…Tani jam bërë pishman, sepse jam shumë krenare për vajzat që kam,” tregon një tjetër nënë që ka abortuar vajzën.
Tirana mban numrin më të lartë të aborteve në vendin tonë referuar të dhënave të Ministrisë së Shëndetësisë. Por në këto të dhëna aborti selektiv nuk është i regjistruar asgjëkundi duke qenë se në rastet e abortit gjinia e bebes nuk shkruhet në kartelën mjekësore.
Ndërkohë çekuilibri i raportit gjinor që po krijohet si pasojë e këtij fenomeni të frikshëm mund të çojë në një rritje të madhe të numrit të djemve dhe kjo referuar rasteve të vendeve si India apo Kina mund të sjellë dhunë gjinore, trafikim e të tjera plagë në shoqëri.
Pra në vendin tonë ka ende çifte që përpara se të pyesin për shëndetin e bebes së tyre pyesin për gjininë dhe janë gati të vrasin foshnjën e tyre, në mos qoftë djalë./TCH
