Ish-kryeministri Sali Berisha dhe njerëz pranë tij janë duke u përgatitur për të çuar vendin në mosbindje civile. Deri më tani ka qenë LSI që e ka bërë të ditur se në shtator do ketë reagime të forta ndaj qeverisë. Media dhe portale shumë pranë Berishës, prej disa ditësh kanë zbardhur atë se çfarë realisht është duke ndodhur në kampin opozitar. Gazeta ”SOT” ka thënë se Basha deri më tani është rreshtuar kundër mosbindjes civile dhe gjithmonë ka treguar maturi.
Që më herët deputeti Flamur Noka e deklaroi se në PD është duke u krijuar një grup që do kërkojë trazira sociale. Ditët e fundit mediat pranë Berishës kanë dhënë sinjale se ky grup është ndërtuar dhe se në shtator do ketë reagime të forta ndaj qeverisë.
Përmes këtyre portaleve, Berisha e ka bërë të qartë se në shtator nëse Basha nuk do të pranojë që të ketë reagime të forta, atëherë ai do të dalë kundër qeverisë me grupin pranë tij. Nga ana tjetër, krah Berishës është dhe LSI. Petrit Vasili e ka thënë hapur se vjeshta do sjellë përplasje të forta. Edhe media pranë Ilir Metës përmes editorialeve dhe komenteve, ditët e fundit kanë dhënë sinjale se në vjeshtë do tentohet rrëzimi i qeverisë.
Sakaq ”SOT” e deklaroi pak ditë më parë se Meta-Berisha synojnë të arrijnë qeveri teknike në dhjetor dhe se në PD janë krijuar dy klane.
I pari është klani i Bashës, të cilët janë për protesta të qeta dhe kundër dhunës.
Ndërkohë grupi i dytë përbëhet nga deputetë që në PD i ka futur Sali Berisha, disa prej të cilëve dhe ish-ministra.
Por pjesë janë bërë dhe disa deputetë të rinj, të cilët njihen si “gjaknxehtë”, pasi kur ka pasur përplasje në Parlament, kanë qenë në ballë të saj. Edhe në takimet që Berisha ka pasur me Bashën, mësohet se i ka kërkuar se tani ka ardhur koha që të agravojë situata, pasi Rama nuk rrëzohet në mënyrë paqësore. Por Basha e ka kundërshtuar. Si duket tani Berisha po mban të karikuar grupin pranë tij për të nisur revoltat në shtator.
Skenari Berisha-Meta
Ilir Meta ktheu mbrapsht ligjin për teatrin dhe ka sulmuar qeverinë ditët e fundit. Madje ai ka mbështetur dhe idenë e opozitës për të ndryshuar disa ligje të reformës në drejtësi. Por Presidenti duket se po bashkëpunon me opozitën në mënyrë të tërthortë. Berisha dhe LSI në shtator do të shfrytëzojnë ligjin e teatrit. Sipas burimeve të gazetës, Berisha ka bërë sherr të madh me Bashën pas mbylljes së sesionit parlamentar, pasi ishte i zhgënjyer nga reagimi i dobët i PD.
Për këtë arsye tani ai bashkë me Kryemadhin janë duke projektuar një skenar dhune. Mazhoranca pritet që në 3 shtator të fusë me procedurë të përshpejtuar shqyrtimin e dekretit të Ilir Metës dhe në datë 6 ose 13 shtator bën rrëzimin e tij, duke i hapur rrugë shembjes së godinës. Pikërisht kjo lëvizje do shfrytëzohet nga Berisha-Kryemadhi për të nisur revoltat. Ditët e fundit ish-kryeministri ka dhënë sinjale se këtë herë nuk do e pyesë fare Bashën, por do nxjerrë njerëzit e tij për të rrëzuar qeverinë.
