Kërkesës së SPAK për arrestimin e Arben Ahmetajt nga Partia e Lirisë iu përgjigjën jo zyrtarisht me një video të deputetes Monika Kryemadhi duke bërë muskuj barku, me gjasë në kopshtin e vilës së saj luksoze në Gjirin e Lalëzit.
Ndërsa, Ilir Meta ka heshtur. Ish-kryetari i LSI-së që kaloi President dhe më pas u rikthye si kryetar i Partisë së Lirisë pothuajse është zhdukur që prej daljes së rezultatit në zgjedhjet e 14 majit, kur u bë bashkë me Sali Berishën për të fituar në koalicionin ‘Bashkë Fitojmë’.
Meta nuk është zhdukur vetëm nga daljet publike. Deri në momentin e shkrimit të këtij artikulli, kreu i LSI-së prej pesë ditësh nuk ka postuar asgjë as në rrjetet sociale dhe për më tepër dy postimet e tij të fundit nuk lidhen aspak me aktualitetin e politikës së brendshme, që ka vluar këto ditë nga dosja Ahmetaj.
Ish-Presidenti e shmang këtë. Ai përkujton në Facebook masakrën e Srebrenicës, ndërsa sjell në postimin e fundit një deklaratë të presidentes së Komisionit Europian, Ursula von der Leyen për tensionet mes Kosovës dhe Serbisë.
Po ku ka humbur Ilir Meta? Voxnews.al mëson nga burime të sigurta që janë në dijeni të dosjeve të tij të shumëfishta në SPAK se hetimet kanë ecur, me ritme të ngadalta, por kanë ecur. Megjithatë, pavarësisht se po ecin ngadalë hetimet janë drejt përfundimit të paktën te dosja e parave të lobimit në SHBA.
Me këtë dosje, por edhe dosje të tjera, si afera CEZ-DIA Ilir Meta pritet që të njihet brenda pak javësh, për të mos thënë ditësh, me akuzat që do të rëndojnë mbi të. Kjo është arsyeja e heshtjes së tij në publik, që nuk përjashton mundësinë që larg prozhektorëve të medias e publikut ai të përpiqet që të lëvizë çdo gur për në mos për ta shmangur, për të shtyrë sa më shumë ditën kur SPAK do t’i trokasë në derë.
Për llogari të hetimeve në dosjen e lobimit në SHBA, SPAK kërkoi një vit më parë informacione nga bankat e nivelit të dytë në Shqipëri për llogaritë e LSI-së në përpjekje për të gjetur burimin e parave të lobimit në SHBA, që kjo parti nuk i ka deklaruar në KQZ.
Dyshohet se paratë burojnë nga korrupsioni dhe marrja zyrtarisht si i pandehur i Ilir Metës, ndoshta edhe i Petrit Vasilit dhe bashkëpunëtorëve të ngushtë të kreut të Partisë së Lirisë është e pashmangshme. Por, çfarë ndodh më pas?
Pas komunikimit të akuzave, Prokurorisë së Posaçme do t’i duhet të çojë në Gjykatën e Posaçme vlefshmërinë e tyre shoqëruar edhe me kërkesën për masën e sigurisë ndaj Ilir Metës. Për këtë masë sigurie, kërkesa shtrënguese si ‘arrest me burg’, apo ‘arrest shtëpie’ kërkohet në rastet kur personi i akuzuar rrezikon që të prishë provat, apo dëmtojë hetimet përmes presionit, shantazheve apo blerjes së dëshmitarëve të mundshëm.
Në dosjen e Metës ka dëshmitarë dhe nisur nga retorika e ish-Presidentit, që fill pasi Arben Kraja i kërkoi KQZ-së një kopje të formularit të dekriminalizimit vitin e kaluar, e cilësoi kreun e SPAK si ‘spurdhjak partie’, Prokuroria e Posaçme nuk pritet që të kërkojë më pak se arrest me burg për Metën.
Ndërkohë, veç akuzave që lidhen me lobimin në SHBA, Meta po hetohet edhe për falsifikim të dokumentacionit zyrtar, një falsifikim që nëse provohet nga Prokuroria e Posaçme është shtrirë edhe përgjatë pesë viteve që kreu i PL-së drejtoi Presidencën.
Meta rezulton me mbiemrin “Metaj” në gjendjen civile, të paktën sipas certifikatës së publikuar nga Monika Kryemadhi, si kundërpërgjigje ndaj kërkesës së SPAK drejtuar gjendjes civile për të mësuar emrin e vërtetë të ish-Presidentit. Akuza për falsifikim ka marrë shkas nga fakti që në të gjitha aktet zyrtare, edhe kur ishte President, ai ka firmosur si Ilir Meta, pra pa ‘J’-në fundore në mbiemër.
Meta po hetohet nga SPAK për korrupsion pasiv parashikuar në nenin 259 të Kodit Penal, vepër e cila dënohet me burgim nga 3 deri në 8 vjet. Gjithashtu, Meta po hetohet edhe për falsifikimin e vulave, stampave ose formularëve, parashikuar në nenin 190/3 të Kodit Penal, vepër për të cilën parashikohet nga 3 deri në 7 vite burg.
Bashkangjitur kallëzimit penal janë kontrata e lobimit, raporti financiar i LSI në vitin 2017 si dhe deklaratat e pasurisë së Metës, Kryemadhit dhe Vasilit për vitin 2017 dhe dosjes i bashkangjiten edhe formulari i dekriminalizimit të Ilir Metës, certifikata në gjendjen civile dhe aktet e dekretet ligjore që ka firmosur në Presidencë, apo detyra të tjera që ka mbajtur në institucionet shtetërore. /Vox News
