Opozita protestën e shtatë kombëtare nuk do ta zhvillojë në datë 31 maj ora 19:00, sikur deklaroi kryetari i Partisë Demokratike, Lulzim Basha pas përfundimit të tubimit të 25 majit, por në datën 2 qershor. Shkak për shtyrjen e protestës është bërë fakti se në 31 maj është nata e Kadrit, një ndër netët e bekuara të muajit të Ramazanit.
Kjo është bërë e ditur ditën e djeshme nga Sekretari i Përgjithshëm i PD, Gazmend Bardhi, i cili me një mesazh u ka shpjeguar demokratëve arsyet e shtyrjes. “Nisur nga fakti që data 31 maj është Natë Kadri, në respekt të besimtarëve myslimanë dhe nisur nga fakti që data 1 qershor është Dita e Fëmijëve, protesta kombëtare do të mbahet më datë 2 qershor 2019, ora 19:00, përpara Kryeministrisë”, shkruhet ndër të tjera në mesazhin e firmosur nga sekretari Bardhi, të shpërndarë nga Partia Demokratike.
Kujtojmë që, protesta e paralajmëruar e 31 Majit nga opozita bëri që dy ditë më parë kryeministri Edi Rama të vendoste shtyrjen me 1 ditë të çeljes së fushatës zgjedhore, duke vendosur datën 1 qershor si datë kur Partia Socialiste do të nisë fushatën.
Zbardhen prapaskenat
Gazeta ka zbardhur edhe disa nga arsyet që çuan opozitën që të ndryshojë datën e protestës. Përveç, festave në fjalë, të cilat u artikuluan nga opozita si pretekst për ta zhvilluar protestën e shtatë kombëtare në datën 2 qershor dhe jo në 31 maj sikundër ishte bëri me dije, shkak është bërë edhe situata politike. Sipas informacioneve, mësohet se kjo protestë e opozitës pritet të jetë e fundit, për vetë faktin se nis fushata zgjedhore dhe zhvillimi i tubimeve kombëtare nga ana e saj e humb vlerën përballë kësaj situate.
Po ashtu, mësohet se një tjetër arsye që ka detyruar opozitën që të shtyjë protestën ka të bëjë me organizmin brenda kampit opozitar. Pra, duke qenë se nuk ka kohë, pasi është vetëm një javë në dispozicion, opozita e pa të arsyeshme që ta shtyjë protestën për të fituar kohë, në mënyrë që të dielën e 2 qershorit të ketë sa më shumë njerëz në sheshin para Kryeministrisë, pse jo edhe më shumë se tubimi i 31 majit.
Madje, të njëjtat burime saktësuan se kryedemokrati Lulzim Basha u ka bërë të qartë edhe vartësve të vetë në mbledhje grupi dhe me krerët e PD se edhe ndërkombëtarët i kanë kërkuar që protestat të mos jenë më të dhunshme, duke i kërkuar atij që të reflektojë. Kështu që, Basha përmes kësaj lëvizje ka marrë edhe dy ditë kohë, në mënyrë që tubimi i 2 qershorit të jetë demokratik.
Ndërkohë që, nga ana tjetër një tjetër arsye që ka detyruar minorancën që të ndryshojë datën e protestës lidhet me mazhorancën. Sipas informacioneve, mësohet se opozita i ka sytë nga shumica, në mënyrë që kjo e fundit të reflektojë dhe të marrë në konsideratë kërkesat e opozitës.
Ja çfarë do ndodhë nëse nuk arrihet marrëveshja
Por burime nga selia blu i pohuan gazetës se nëse nuk arrihet marrëveshja, ku opozita dhe mazhoranca të pranojnë kërkesat e tyre, Shqipëria pritet që të shkojë drejt destabilizimit. Sipas informacioneve, mësohet se në mbledhjet që Basha ka pasur me ish-deputetët, aleatët e tij dhe krerët e degëve të PD është vendosur që në rast se mazhoranca refuzon kërkesat e opozitës, kjo e fundit do të zhvillojë protesta të përditshme dhe të dhunshme.
Madje, mësohet se paralelisht me protestat në shenjë hakmarrje ndaj qëndrimit joreflekues të mazhorancës pritet të bllokohen edhe akset rrugore nacionale, duke penguar qarkullimin e lirë për qytetarët dhe automjetet, në mënyrë që të detyrojnë qeverinë të pranojë kërkesat e saj. Ndërkohë që, mësohet se kulmin protestat ditore, të cilat pritet të jenë të dhunshme do ta kenë në datën 29 qershor dhe në datën 30 qershor, ditë këto kur shpërndahet baza materiale dhe zhvillohen votimet./Rigels Seliman
