Mëngjesin e ditës së sotme ka nisur zyrtarisht lufta në Ukrainë, pas sulmeve të befta ruse. Ndërkohë Kina që përmes deklaratave të saj ka mbajtur një qëndrim më pranë Rusisë, ka reaguar ditën e sotme.
Kina ka refuzuar të dënojë sulmin e Rusisë ndaj Ukrainës të enjten. Në vend të kësaj përsëriti thirrjet për palët që të “ushtrojnë vetëpërmbajtje” dhe akuzoi Shtetet e Bashkuara se i ka hedhur “benzinë zjarrit”.
Në një konferencë të Ministrisë së Punëve të Jashtme që vazhdoi për më shumë se 90 minuta, zëdhënësja Hua Chunying shmangu më shumë se 11 pyetje në lidhje me veprimet e Rusisë në Ukrainë. Ato përfshinin pyetje të përsëritura nëse Pekini do t’i konsideronte aktet e Rusisë një pushtim dhe nëse ato shkelnin integritetin territorial të Ukrainës.
Hua shtoi se Kina do të fillojë importimin e grurit rus, një veprim që mund të lehtësojë ndikimin e sanksioneve perëndimore ndaj Rusisë.
“Çështja e Ukrainës ka një sfond historik shumë të ndërlikuar. Ajo ka evoluar në situatën aktuale për shkak të veprimit të përbashkët të faktorëve të ndryshëm… siguria duhet të jetë çështje e bashkëpunimit të përbashkët dhe sigurisë së qëndrueshme, dhe shqetësimet legjitime të sigurisë të të gjitha palëve duhet të respektohen dhe të adresohen”, tha Hua duke iu përmbajtur komenteve të bëra një ditë më parë.
Kina “po ndjek nga afër situatën e fundit” dhe u bën thirrje palëve “të ushtrojnë përmbajtje për të shmangur daljen e situatës jashtë kontrollit”, tha Hua në mënyrë të përsëritur.
Pas pyetjeve nga media të shumta nëse Kina i konsideronte lëvizjet e Rusisë një pushtim, Hua i pyeti gazetarët: “Pse jeni të fiksuar me këtë pyetje?
“Mund të pyesni palën amerikane. Ata vazhdojnë të ndezin zjarret… Mund t’i pyesni nëse kanë ndonjë plan për të shuar zjarrin.”
Të enjten, administrata doganore e Kinës tha gjithashtu se do të fillojë të lejojë importet e grurit që nga 24 shkurti nga Rusia.
