Një mik austriak, i cili po kthehej nga një periudhë e shkurtër pushimesh në Holandë, më flet me habi për nivelin e çmimeve që kishte parë në Amsterdam. Një biletë autobusi kushton 3 euro, një biçikletë me qira 10 euro në ditë, një kafe në bar nga 3 deri në 4 euro, një hot dog blerë tek ambulanti 7 euro, një pica margarita 15 euro, një biletë hyrjeje në muze 20 euro, për në kinema 10 euro, një qethje flokësh 30 euro, një biftek në një steak house 30 euro + 4 euro për bukën që ta sjellin në tavolinë. Madje paguhet edhe për banjot publike: 1 euro.
Dhe, nëse një hotel me tre yje kushton mesatarisht 120 euro nata, kush e di sa kushton të marrësh me qira apo të blesh aty një shtëpi. Sot Lulzim Basha është kthyer në Tiranë nga udhëtimi i tij i radhës në Holandë dhe pyetja që shtrohet është e thjeshtë: në rast se një qytetari austriak, të mësuar me çmimet evropiane (dhe me një pagë evropiane), i duket shumë e shtrenjtë kostoja e jetesës në vendin e tulipanëve, ku i gjen paratë Lulzim Basha për të kaluar pothuajse çdo fundjavë në Holandë?
