Kërkesa e Prokurorisë së Përgjithshme për vendosjen në dispozicion të materialeve të Partisë Demokratike për hetimin e kryebashkiakut të Vorës Agim Kajmaku i drejtohet personalit Sekretarit të Përgjithshëm të selisë blu Gazmend Bardhi. Përmbajtja e kësaj kërkese të ardhur në selinë blu është zbardhur së fundmi.
“Na vini në dispozicion informacionin që zotëroni. Më 20 gusht kërkuat verifikim të thelluar për Kajmakun. Më 23 gusht filloi verifikimi i thelluar’’, shkruhet në kërkesën që organi i akuzës i ka bërë Partisë Demokratike.
Numri 2 i PD-së Gazmend Bardhi deklaroi para mediave se pasaporta e Agim Kajmakut përputhet me numrin e pasaportës së personit Jorgo Toto, për të cilin selia blu pretendon se është identiteti i rremë i kryebashkiakut të Vorës i përdorur për t’i shpëtuar dënimit me 10 vite nga drejtësia greke për falsifikim parash.