Ambasada Amerikane ka reaguar pas votimit ditën e sotme në Parlament për dy anëtaret e Gjykatës Kushtetuese, Elsa Toska dhe Fiona Papajorgji.
Në reagimin e Ambasadës thuhet se votimi i sotëm i Parlamentit e çon Shqipërinë përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratike.
“Prej votimit unanim të reformës në drejtësi në 2016-ën, institucionet shqiptare, përfshirë edhe organet e reja të pavarura të gjyqësorit, kanë punuar fort për të përmbushur vullnetin e popullit. Votimi i sotëm i Parlamentit çon Shqipërinë përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratike. Shtetet e Bashkuara mbeten të përkushtuara për të mbështetur ngritjen e një sistemi gjyqësor të pavarur dhe të ndershëm në Shqipëri,”-thuhet në reagimin e publikuar në faqen në Facebook të ambasadës.
Kuvendi i Shqipërisë miratoi ditën e sotme me 105 vota pro emërimin në Gjykatën Kushtetuese të kandidateve Elsa Toksa dhe Fiona Papajorgji pas rreth 3 orësh debat në seancën plenare.
Pas zgjedhjes nga Kuvendi, kandidatët do të duhet të dekretohen nga presidenti Meta për të marrë emërimin e tyre. Nëse presidenti i dekreton atëherë Gjykata Kushtetuese bëhet me 5 anëtarë.
