Panairi i librit ‘Tirana 2019’ çel sot dyert e edicionit të tij të 22-të në Pallatin e Kongreseve.
Ky është një nga evenimentet kryesore të promovimit të dijes. Qytetarët do të kenë mundësi të vizitojnë rreth 100 stenda ekspozuese të të gjitha trevave shqipfolëse që i janë bashkuar aktivitetit.
Ajo që e bën gjithmonë të veçantë panairin është se lexuesit kanë mundësi të takojnë nga afër disa prej autorëve të tyre të preferuar si dhe të njihen me botimet e reja.
Rreth 60 tituj të rinj do të promovohen në panair dhe rreth 200 shkrimtarë, krijues, përkthyes do të jenë pjesë e 100 veprimtarive, të cilat do të organizohen në stendat e shtëpive botuese.
Organizatoi i Panairit, Petrit Ymeri, që është gjithashtu edhe Kryetari i Shoqatës së Botuesve, bëri të ditur se do të ketë shumë aktivitete gjatë ditëve të panairit që kanë të bëjnë me përkthimin dhe me promovimin e botimeve të reja. Ai nënvizoi gjithashtu se botuesit shqiptarë kanë bërë hapa të mëdha në krahasim me institucionet shtetërore.
“Një nga temat kryesore, që do të diskutohet është që botuesit shqiptarë kanë bërë hapa shumë të mëdha gjatë këtyre viteve, krahasuar me institucionet shtetërore. Po përballemi me një indiferencë të dukshme të institucioneve shtetërore për të ndihmuar sistemin libror në Shqipëri” tha ai.
Një tjetër problematikë që ai ngrit është mos pajisja e bibliotekave me botimet e reja.
“Në fokus janë korsitë e biçikletave, të cilat mund të të çojnë deri tek stacioni i autobusit, ndërkohë që vetëm korsia e librit mund ta çojë vendin në Evropë”, shtoi Ymeri.
Panairi do të zgjasë nga data 13 deri në datë 17 nëntor.
