Një ditë më parë lideri demokrat Lulzim Basha bëri të ditur se partitë opozitare nuk do të marrin asnjë leje në polici për zhvillimin e protestave kundër taksës së Rrugës së Kombit dhe taksave të reja të larta që qeveria e Edi Rama ka marrë së fundi. “Nuk mund të na arrestojnë të gjithë popullin”, – tha Basha.
Por Policia e Shtetit, në një deklaratë për mediat sot në mbrëmje, paralajmëron se forcat opozita dhe të gjithë që do të marrin pjesë në protestën që konsiston në bllokimin e disa akseve kryesore rrugore kombëtare, do të përballen me ligjin, duke paralajmëruar kështu arrestime.
Paralajmërimi për protestën e së enjtes, më 5 prill, është bërë vetëm përmes medias dhe opozita nuk ka marrë leje në Polici.
“Organizatorët e kësaj proteste të paligjshme do të përballen me ligjin për çdo pasojë të paparashikuar, që mund të sjellë një protestë e organizuar për të nxitur rrëmujë dhe konflikt në pika nevralgjike për qarkullimin e njerëzve dhe mjeteve”, thotë Policia e Shtetit.
Policia i bën apel qytetarëve që të mos bëhen pjesë e protestës, duke paralajmëruar se në të mund të marrin pjesë persona me precedentë kriminalë të paguar për të nxitur rrëmujë dhe konflikt.
Deklaratë e Policisë së Shtetit për protestën e së enjtes
Siç është bërë e njohur në media, disa parti opozitare kanë lajmëruar se në datën 5 prill, do të zhvillojnë një protestë, shoqëruar me bllokimin e disa akseve rrugore kombëtare.
Policia e Shtetit nuk ka marrë njoftim ligjor për protestën dhe mbështetur në ligjin “Për tubimet”, nuk mund të lejojë protesta të askujt, që në emër të lirisë së tubimit, cenojnë lirinë e sigurinë e të tjerëve.
Zhvillimi i protestës së paralajmëruar mediatikisht, për vetë natyrën e saj përbën një cënim të rëndë të ligjit, të rendit publik dhe lirisë e sigurisë së çdo qytetari, që ka të drejtën të përdorë hapësirat e pushtuara nga një protestë e tillë.
Organizatorët e kësaj proteste të paligjshme do të përballen me ligjin për çdo pasojë të paparashikuar, që mund të sjellë një protestë e organizuar për të nxitur rrëmujë dhe konflikt në pika nevralgjike për qarkullimin e njerëzve dhe mjeteve.
Policia e Shtetit njeh dhe respekton si të paprekshme të drejtën për të protestuar. Por ajo ka përgjegjësi ligjore, si dhe gatishmërinë për të mos lejuar cënimin e interesit të qytetarëve.
Policia e Shtetit u bën apel të gjithë qytetarëve të mos bien pre e një politike të angazhuar për të goditur ligjshmërinë dhe institucionet e vendit, duke dëmtuar interesat e njerëzve e të vetë vendit.
Zhvillimi i një proteste të paligjshme mund të përdoret nga elementë me precedentë kriminalë dhe të nxitur a të paguar për të krijuar paqëndrueshmëri shoqërore.
Policia i bën thirrje çdo qytetari të mos bëhet pjesë e kësaj proteste të paligjshme dhe me rrezik për rendin e sigurinë.
Gjithashtu Policia e Shtetit i kërkon paraprakisht ndjesë çdo qytetari, për çdo rast kur nuk do te mund t’i shërbejë si duhet lirisë se qarkullimit.
