Një pjesë e dosjes “339” ka kaluar për gjykim. Në seancën paraprake zhvilluar mesditën e djeshme, Gjykata e Posaçme për Korrupsionin dhe Krimin e Organizuar ka pranuar kalimin në gjykim të dosjes penale ndaj ish-deputetit Arben Ndoka dhe 11 personave të tjerë të akuzuar për tjetërsimin e pronave në bregdetin e Lezhës.
Sipas prokurorëve të SPAK, ata kanë konsumuar veprën penale “Falsifikim i dokumenteve”, “Falsifikim i vulave, stampave ose i formularëve” dhe “Shpërdorim i tokës”, në kuadër të një grupi kriminal. Për Arben Ndokën ka rënë akuza e “Grupit kriminal”.
Ndërsa për Zef Ndokën janë pushuar akuzat, me arsyetimin se është bërë pronar i një trualli pa dijeninë e tij. Gjatë seancës paraprake të gjithë të akuzuarit kanë mbajtur qëndrim mohues për akuzën, duke kërkuar pushimin e çështjes. Kjo çështje është një nga shtatë fraksionet e dosjes së famshme numër “339”. Ndoka është hetuar nën masën e sigurisë “Detyrim paraqitje” dhe u vu në pranga rreth një vit e gjysmë më parë, pas operacioni të koduar “Vol-vo 4”. Sipas prokurorisë bëhet fjalë për sipërfaqe tokësore në zonën e Malit të Rrenzit, Shëngjinit, Rana e Hedhur, Laguna e Lezhës si dhe disa apartamente në plazhin e Shëngjinit. Sipas Krimeve të Rënda sipërfaqja e tokës, e cila prej muajit prill është vënë nën sekuestro, është përfituar në mënyrë të paligjshme, pasi toka ka qenë në pronësi të shtetit, por nëpërmjet dokumenteve të falsifikuara, është ndryshuar pronësia nga shtet në privat, çka ka sjellë që pronarët e sipërfaqes tokësore të bëhen anëtarë të fisit Ndoka në Lezhë. Kujtojmë që dy vëllezërit Arben dhe Gjevi Ndoka si dhe motra e tyre janë vënë në prangat e policisë gjatë operacionit të koduar “Vol-vo 4”.
“Në kuadër të hetimit të procedimit penal nr “339” të vitit 2016, në prill të këtij viti prokuroria sekuestroi si produkte të veprës penale 300.000 metra katrorë tokë në bregdetin e Lezhës. Sipërfaqet ndodhen konkretisht në vendet e njohura si “Mali i Rrenzit”, Shëngjin, “Rana e Hedhun”, Laguna e Lezhës si dhe disa apartamente në plazh. Sekuestrimet kanë një vlerë rreth 40 milionë euro. Prokurorët e çështjes te Krimet e Rënda janë Vladimir Mara dhe Dritan Prençi. Sekuestrot janë dhënë me vendimin e gjyqtarit Bib Ndreca”, është shprehur zyrtarisht Prokuroria për Krime të Rënda në lidhje me sekuestrimin e pronave të familjes Ndoka.
Ish-deputeti ndodhet nën masën e sigurisë “Arrest shtëpie” dhe dy ditë më parë ka kërkuar nëpërmjet avokatit të tij revokimin e kësaj mase në një masë më të butë. Seanca ndaj tij u shty për mungesë të prokurorëve të çështjes” thuhet në dosje.
Dosja
Referuar dosjes hetimore, prokuroria pretendon se është e provuar që ish-deputeti i PS-së, Arben Ndoka, në bashkëpunim me persona të tjerë, dyshohet si i implikuar në abuzimet me troje shtetërore në zonën e Lezhës dhe Kurbinit, përmes falsifikimit të dokumenteve e vulave. Ai është vënë nën akuzat si “Falsifikimi i dokumenteve”, “Falsifikimi i vulave, stampave ose i formularëve”, “Shpërdorimi i tokës”, në kuadër të një grupi kriminal, të përfshirë në tjetërsim tokash. “Nga praktikat e sekuestruara në Zyrën e Regjistrimit të Pasurive në Lezhë, më datë 13.08.2015, për pasurinë Nr.1018 Ranishte rezulton se përfitues janë shtetasi Ndue Ndoka, Dile Ndoka, Aleksandër Ndoka, Arben Ndoka, Gëzim Ndoka, Mimoza Ndoka dhe Gjevi Ndoka me prokurë.
Shtetasi Gjevi Ndoka në bashkëpunim me të gjithë familjarët dhe anëtarët e grupit të strukturuar kriminal, nëpërmjet ndërhyrjeve, korrupsionit por edhe shantazhimit kanë përvetësuar prona shtetërore kryesisht në zonat bregdetare”, shkruhet në dosje. Ndërkohë, ish-deputeti Ndoka ka mohuar se ka falsifikuar dokumente dhe ka tjetërsuar troje për t’i përvetësuar ato. Ai është shprehur se thjesht ka kërkuar të shfrytëzojë një hapësirë, për të cilën ka kërkuar edhe leje, por nuk ka kryer veprime të kundërligjshme. Ndërkohë, vëllai i tij, Gjevi Ndoka, është i përfshirë në trafikimin e lëndëve narkotike dhe ka njohje me Avdylajt.
