Deputeti i Partisë Demokratike Myslim Murrizi tha se e ka habitur qëndrimi i aleatëve të kryedemokratit Lulzim Basha.
“Nuk dua të bëj bajraktarin si Rama me Bashën. Ajo që më ka habitur kohët e fundit është zbythja e aleatëve. Katër deputetë kanë qenë në listat e PD, Ndoka, Shehu, Mediu, Dule. Kanë qenë në një linjë dhe ata për ta ndryshuar këtë sistem zgjedhor. Kur thanë se i mirë është ky sistem nëse bëhen zgjedhjet në qershor u habita. Nëse duan sisteme në bazë të temperaturës së kohës kur bëhen zgjedhjet kjo është qesharake. Ky sistem ka vrarë demokracinë.
Me këtë sistem edhe unë po të jem kryetar partie të pëlqen vetja dhe kthehesh në neodiktator. Ndaj Rama qeveris me karavidhe që nuk kanë asnjë përgjegjësi për votuesit e majtë të këtij vendi. 9 ministra nuk dinë se çfarë është elektorati socialist, kanë ardhur se i njeh Rama. Të duket sikur po rivalizon me të madhin Zot. Ky harbutllëk ndodh si në PS dhe PD.
Ai është i sigurtë se nëse qytetarëve u sigurohet mundësia të zgjedhin përfaqësuesit e tyre në Kuvend, 70 % e deputetëve që kanë qenë dhe janë aktualisht nuk do të mund të futen dot më në sallën e Kuvendit”, tha Murrizi në Ora News.
