Nga Besi Bekteshi
Po “punë e madhe” fort se “Bild” ka “error 404” për artikullin e saj mbi PD-në, rusët dhe Lulzim Bashën, por dhe regjistrat e Departamentit të Drejtësisë së SHBA-së që thoshte artikulli! Njerëzit sot janë bërë jo vetëm të zgjuar, por dhe koherentë me teknologjinë apo dhe të rejat në shërbim të tyre.
Në fakt, nuk besojmë as në anglishten dhe as gjermanishten e Partisë Demokratike dhe aspak as te ajo e Partisë Socialiste.
Jo fare, sepse e kanë kollaj që të përkthejnë aty për aty, në atë moment pikërisht artikujt si nga “The Times” dhe nga “Bild” pa ndërhyrjen e “klerikëve supersticiozë” në dy selitë e “mëdha” SHQUP dhe Rilindje. Sigurisht të më falin klerikët tanë të nderuar, por këto që sapo përmenda unë janë tipat e pagabueshëm (afër zotit) dhe në përkthim, duke u sjellë si të jenë “barinjtë” e tufave tona popullore. Po çfarë rëndësie ka nëse “The Times” e ka artikullin ku shtrohet lobimi rus dhe emri i Lulzim Bashës e PD-së dhe “Bild” e ka botuar të gjatë dhe të ashpër dhe tani është – error 404? Ne nuk kemi pritur që nga PD-ja të na bëhet përkthimi i këtyre artikujve, sepse instinktivisht si padashje, “fap” menjëherë, si celulari dhe PC-ja apo laptopi na i përkthen vetë. E kam fjalë për ata që “përtojnë” ta lexojnë në gjermanisht apo anglisht vetë – sigurisht.
E kush ishte e përbashkëta? Sigurisht lobimi nga rusët dhe koncepti: të pengohet integrimi i Shqipërisë në BE, të pengohet me çdo kusht, sepse në qoftë se Shqipëria do të hapte negociata, sipas ideatorëve të lobingut i bëhej një e mirë e madhe Edi Ramës.
Kaq, jo ndonjë gjë të madhe kushedi! Vetëm një lobim që të dobësohet kundërshtari politik – jo më tepër!.Sepse dikush i thotë dhe një pa burrni të madhe kësaj gjëje, por unë jam gati të bëj “be e rrufe” me atë që kam përkthyer me “Google Translate” sa pa dalë “error 404” se nga PD-ja, as që e kanë pasur me fatin e Shqipërisë se sa të “dobësojnë, ti bëjnë një shërbim të merituar Edi Ramës”. Për Shqipërinë ka kush mendon! Pra e dinë ata në Berlin, Washington, Paris dhe Londër dhe sigurisht SHQUP-it nuk është se i duhet shumë kjo çështje! Pastaj vetë Lulzim Basha dhe SHQUP-i i tij i kanë bërë shërbimet më të mëdha Edi Ramës. Me artikullin e “Bild” dhe përgjimet e Prokurorisë në Tiranë, por që kjo e fundit ja kishte servirur Bild-it kanë arsyetuar dhe molotovët kundër portës së Kryeministrisë, që në SHQUP e dinë të Rilindjes dhe Ramës e jo të shtetit shqiptar. Kurse ky lobimi “error 404” në fund të fundit, ishte thjesht bashkëpunim ose ndihmë e rusëve që Rama të mos merrte dekorata, po të hapeshin negociatat me BE-në!
Më vjen keq që dhe “The Times” nuk ka “error 404” sepse anglishten e dinë më shumë njerëz dhe ndoshta nuk do të kishte kaq shumë nevojë për “google translate”, por në përgjithësi këta dy artikujt i kanë bërë një shërbim demokracisë në Shqipëri. Po një shërbim të madh, për t’i treguar njerëzve se klasa politike e tyre është një “rondokope”, një elitë politike maskareshë që nuk lë gjë pa bërë, që nuk mendon qoftë dhe një sekondë për Shqipërinë, që nuk do vendin e saj dhe që jo vetëm nuk është patriote, por është në shërbim vetëm të përfitimit dhe pasurimit e sigurisht etjes për pushtet. Për të kuptuar njëherë e përgjithmonë se kanë votuar dhe kanë pranuar tju vijnë mbi kokat e tyre, individë dhe elitë që nuk do Shqipërinë dhe nuk do integrimin, por do vetëm pushtetin. Një elitë politike që mbasi ka vjedhur vetë zgjedhjet, akuzon kundërshtarin si hajdut votash! Të tillë janë dhe kopukët e akuzave të gjithmonë kohës mbasi mbarojnë zgjedhjet. Sepse asnjëherë nuk u dënuan pse vjedhin, pse abuzojnë dhe pse devijojnë votën, pse paguajnë dhe pse harxhojnë miliona euro në fushata dhe nuk japin llogari, pse lobojnë dhe me dreqin, mjafton që shqiptari tjetër që ka abuzuar dhe e ka tepruar dhe ai – të largohet nga pushteti, duke i mohuar Shqipërisë integrimin dhe afrimin me BE. Kaq, sepse në përgjithësi të tjerat janë kuptuar nga një shumicë shqiptarësh.
Është kuptuar se nuk e kanë seriozisht dhe nuk e kanë as sinqerisht me shtetin dhe ligjin, por as me miqtë tanë ndërkombëtarë dhe me kombin. Në SHQUP teorikisht duhet të ndalet dikush nëse realisht e kanë bërë këtë, lobim i përfolur jo vetëm te The Times dhe Bild. Pra teorikisht një parti demokratike duhet të shqetësohet nëse është kërkuar ky shërbim, sepse në fund të fundit do të ishte një e drejtë për tu sqaruar kur akuza merr përmasa të tilla. Por kjo nuk ndodh as te PD dhe as te PS, sepse nuk janë parti me statute dhe nuk kanë demokraci partiake ose më qartë, ju mungon demokracia e brendshme. Nuk e njohin atë. Njëra nuk njeh lobingjet për pushtet dhe vota në zgjedhje si akuzë dhe tjetra nuk njeh lobimin rus për të mos kaluar klasën Shqipëria, për hatër të pushtetit të Edi Ramës e bërë në mënyrë tragjike nga PD.
Mirë që nuk e njohin, por dhe skandalit nuk i bëjnë as analizë dhe as kërkesë politike për hetim normal dhe në demokraci. Në këtë mënyrë vërtetojnë se nuk janë organizma demokracie, por gati gati sete satanike, që të bëjnë për të qeshur me urdhërat, “disiplinën e frikës dhe persekucionit idiot politik të sotëm” që në fund të lë pa punë, pa integrim dhe të jep rrugët e botës si në vendin kur prodhohet “Bild” dhe po ashtu ku del “The Times”! Ne u “ngutëm” që përkthyem me “google translate” dhe nuk pritën si SHUP-in dhe vetë njeriun e politikës moderne në Shqipëri, Lulzim Basha. U ngutëm dhe ja – ramë në “qorrsokak”. Ne na “ngatërroi shumë Bild”, por besuam ashtu “qorrazi”, duke ditur se ishte revista më e dashur dhe më e madhe, por dhe më e drejtë sikundër na kishte thënë Basha dhe elitokracia e demokratëve të Tiranës! Ku e dinim ne se “Bild” do bënte “error 404” mbasi e ka lënë hapur shumë kohë artikullin ku Lulzim Basha dhe PD-ja dalin për faqe të zezë si miq të rusëve dhe armiq të integrimit të Shqipërisë në BE. Jo nuk e dinim dhe – fap me Google Translate, ja futëm një përkthim aty për aty.
Sa më vjen keq. Unë për vete nuk e bëj më këtë gabim. Jo, do pres përkthimin nga SHQUP dhe do pres më shumë se 24 orë për ta lexuar, kohë e cila është e mjaftueshme për të dalë apo për të mos dalë error 404. Ndërkohë Lulzim Basha dhe të tijtë në PD mund të vazhdojnë shërbimin ndaj Ramës, sepse në fund të fundit një “error 404” i vogël është.
