Ndërkombëtarët janë vënë në lëvizje për të goditur krimin e organizuar dhe korrupsionin në vend. SPAK është organi më i rëndësishëm i ngritur në kuadër të reformës në drejtësi dhe shpresat e të gjithëve janë tek ky institucion. Teksa është theksuar se ndërkombëtarët do të kenë një rol shumë të rëndësishëm në organet e luftës kundër korrupsionit, SHBA- BE janë vënë në lëvizje.
Në konferencën rajonale të zhvilluar dje për korrupsionin dhe krimin ekonomik, kreu i Prokurorisë së Posaçme Antikorrupsion Arben Kraja deklaroi se drejtësia shqiptare po bashkëpunon me ndërkombëtarët. Ai bëri të ditur se janë ngritur disa grupe hetimore të përbashkëta me autoritetet e huaja.
“Të hetosh dhe ushtrosh ndjekje penale ndaj zyrtarëve të lartë padyshim që ka vështirësi. Janë njerëz të fuqishëm me pushtet, që ndodhen direkt me situata penale nga më të ndryshmet. Kërkon vendosmëri, profesionalizëm dhe objektivitet. Në kuadër të kësaj sigurisht do kesh dhe suksesin. Aktualisht Prokuroria e Posaçme ka 8 të emëruar dhe dy të caktuar përkohësisht. Kemi nisur hetimet duke u fokusuar në çështjet më të rëndësishme. Kemi rivendosur kontaktet me partnerët ndërkombëtarë për çështje që vazhdojnë të hetohen. Janë disa hetime të përbashkëta që po bëhen”, deklaroi Kraja.
Gjithashtu, kërkesën zyrtare me shkrim të bërë disa ditë më parë për KLP-në për emërimin e prokurorëve të tjerë, kreu i SPAK e tha dhe gojarisht gjatë konferencës. Kraja ritheksoi se Prokuroria e Posaçme ka nevojë për shtim të prokurorëve, pasi ngarkesa në institucion është e madhe.
Kërkohet rishikimi i ligjit
Nga ana tjetër, kreu i Këshillit të Lartë të Prokurorisë Gent Ibrahimi në fjalën e tij i kushtoi rëndësi kompetencave të SPAK. Ibrahimi tha se Prokuroria e Posaçme sot ka në kompetencë të hetojë çdo vepër penale të korrupsionit, përfshirë dhe ato të qytetarëve të thjeshtë. Sipas kreut të KLP-së, shtrirja e kompetencave deri te zyrtarët më të thjeshtë po e pengon punën e SPAK dhe ai kërkoi që të bëhen ndryshime në ligj, me qëllim që kjo prokurori të fokusohet vetëm te korrupsioni i politikanëve.
“Po ta krahasosh sferën e çështjeve penale që heton sot SPAK në krahasim me atë sferë çështje që hetonte Prokuroria e Krimeve të Rënda, është evidente një ngushtim dhe përqendrim tek ato vepra penale që janë të rëndësishme, krimi i organizuar dhe korrupsioni. Kam një pikëpyetje për këtë të dytën, që jam i bindur që do dëgjojmë për të gjithmonë e më shpesh në të ardhmen nëse zgjedhja që është bërë për juridiksionin e SPAK sa i takon korrupsionit është apo nuk është më e mira. Fakti është që Prokuroria jonë e Posaçme do të jetë e detyruar të hetojë edhe çështjen më banale të korrupsionit në periferitë e këtij vendi, krahas çështjeve të rëndësishme të korrupsionit që përfshijnë liderin e lartë të administratës dhe të politikës. Kjo ndoshta me kalimin e kohës do të vërtetojë që nuk ishte zgjedhje e mirë. Është vërtetë jetike që zgjedhja, vendimet në lidhje me juridiksionin të jenë të tilla që të mundësojnë rezultatet që ne i presim. Në rast se presim rezultate në fushën kundër korrupsionit është e domosdoshme që portofoli i Prokurorisë së Posaçme në këtë aspekt të jetë më i reduktuar dhe të jetë i orientuar drejt atyre funksionarëve që kanë peshë”, tha kreu i Këshillit, Gent Ibrahimi.
