Ngjall dyshime fakti që në Ligjin për Dekriminalizimin janë përjashtuar disa krime penale.
Për shembull, dekriminalizimi nuk e pengon të mbajë poste publike “një person që ka vrarë në kushtet e tronditjes së fortë psikike shkaktuar nga dhuna ose fyerja e rëndë”.
Në një editorial në DITA sot shkruhet:
“Ky krim dhe neni në fjalë i Kodit Penal që e ndëshkon atë, janë përjashtuar si objekt i ligjit për dekriminalizimin. Përse?! Mos ndoshta nga që edhe në 21 janar urdhrat për vrasje dhe vrasjet mund të përligjen vetëm po të pranohet se janë kryer në kushtet e tronditjes psikike shkaktuar nga dhuna e protestuesve?”
Dekriminalizimi nuk pengon, gjithashtu, vazhdimësinë në politikë dhe poste publike, “të gjithkujt që ka kryer vrasje me kapërcim të kufijve të mbrojtjes së nevojshme”.
Përse? Mos edhe kjo ka të bëjë me masakrën e 21 janarit dhe mbrojtjen e reputacionit të politikanëve si Basha e Berisha – ngre dyshimin editoriali dhe vijon:
“Të gjithë e kanë parë “live” se vrasjet në 21 janar u kryen në kapërcim të kufijve të mbrojtjes së nevojshme. Sepse jo vetëm nuk pati sulm të armatosur mbi kryeministri (si në 14 shtator 1998) por edhe të gjithë protestuesit, si ata që u vranë edhe ata që, për fat, vetëm u plagosën, ndodheshin jashtë murit rrethues të Kryeministrisë. Rastësi është ky përjashtim i këtij krimi si objekt i dekriminalizimit?”
Po pse ndërkombëtarët e duartrokitën nxehtësisht dekriminalizimin?
“Konsensusi mes PD dhe PS, i arritur edhe me presionin e ndërkombëtarëve, ka pjellë një ligj që përjashton disa krime të rënda që implikojnë politikanë të lartë shqiptarë. Dhe si i tillë, nga ndëshkues i kriminelëve të politikës, ligji degradon në mburojë e tyre. Nëse deri më sot kemi patur pandëshkueshmërinë si moszbatim ligji, me miratimin e dekriminalizimit, do të kemi pandëshkueshmërinë si zbatim i ligjit” – shkruan DITA.
