Dje janë mbushur plot 29 vite nga masakra e 2 prillit 1991, ku humbën jetën 4 protestues të opozitës së kohës. Kjo ngjarje ka mbetur pa autor dhe është e veshur me mister edhe sot kur kanë kaluar kaq shumë vite.
Por në lidhje me këtë ngjarje ka reaguar edhe Petro Koçi, i cili është eksponent i Partisë Socialiste në vite. Ky i fundit për “sot” u shpreh se 2 prilli i ’91 ishte një ngjarje e rëndë që u organizua për të sjellë Sali Berishën në pushtet.
Madje, zoti Koçi theksoi se Partisë Demokratike nuk i interesonte zbardhja e ngjarjes dhe një gjyq i drejtë, por sipas tij, e përdori politikisht çështjen. “Ishte një ngjarje shumë rëndë.
U vranë 4 djem nënash në moshë të re. 2 prilli ’91 i solli përfitime politike Partisë Demokratike. Shpejtoi ardhjen e saj në pushtet. Ndërkohë, kjo parti nuk lejoi kryerjen e shume veprimeve hetimore.
PD nuk kishte interes për një gjyq të drejtë, por bëri presion për një gjyq politik. U dënuan disa kuadro të Policisë dhe të Ministrisë së Brendshme nën presionin e politikës dhe paracaktimeve publike të Partisë Demokratike.
Krahasojeni me “21 janarin”. Imagjinoni sikur të gjendeshin për 2 prillin prova të qarta si për 21 janarin?
Sikur të kishte regjistrime si në Kryeministri e të fshiheshin për të mbuluar gjurmët? Dhe krahasoni dënimet.
Kështu që, 2 prilli i 1991 ishte një ngjarje e rëndë që u organizua për të sjellë Sali Berishën në pushtet”, deklaroi Koçi
