Kryeministri Edi Rama ka reaguar për gjestin në Lezhë ku Stafi i Urgjencës refuzoi shpërblimin 5 mijë lekë pasi pretendonte se duhet të merrte 1 mijë euro. Rama shprehet se pagesë mbi pagën do të marrin vetëm ata që janë në vijën e zjarrit dhe jo ata që janë brenda detyrës në territorin e tyre.
Po ashtu kryeministri e konsideron këtë si një nxitje nga jashtë për kërkesa shpërblimi dhe i bën thirrje mjekëve dhe infermierëve mos bëhen masha politike duke cënuar misionin e shenjtë.
REAGIMI I KRYEMINISTRIT RAMA
Unë e kam thënë shqip që do të paguajmë 1000€ mbi pagën për mjekët e infermierët në Vijën e Zjarrit! Kush ka ngatërruar vijën e zjarrit në spitalet Covid e në autoambulanca, me detyrën e bluzës së bardhë në territor, duhet të kthjellohet e të mos turpërojë bluzën e bardhë!
Kush i nxit nga jashtë kërkesat për shpërblime pa asnjë sens bën politikën e mbrapshtë që ka bërë gjithnjë dhe do ndëshkohet nga populli, kush nga brenda bëhet mashë politike cënon misionin e shenjtë e moralin e bluzave të bardha në këtë luftë dhe nuk do të justifikohet në vijim!
