Lulzim Basha me sa duket i është bashkuar korit të kritikëve të tij brenda PD se opozita e ka të pamundur të vijë në pushtet me votë për një kohë të gjatë.
Një pesimizëm i tij ka ardhur jo falë mirëqeverisjes së Edi Ramës, por për shkak të dobësisë deri në dhimbje të opozitës.
Mungesa e alternativave, mungesa e njerëzve që krijojnë kauzë për të ardhur në pushtet dhe mbi të gjitha goditja që opozita mori me dhënien nga KE të rekomandimit të pakushtëzuar për hapjen e negociatave të Shqipërisë në BE, e ka bindur Bashën se nuk vjen dot në pushtet.
Pikërisht për këtë arësye, kreu i opozitës po bën të gjitha përpjekjet për të krijuar kushtet e krijimit të një qeverie të përbashkët me Ramën.
Këtë përgjërim ndaj Ramës për një bashkëqeverisje mes PD e PS, Basha e argumenton me faktin se integrimi ka nevojë për bashkëqeverisje, unifikim qëndrimesh dhe front të përbashkët kundër krimit dhe korrupsionit.
Dhe për të artikuluar ftesën ndaj Ramës për bashkëqeverisje, Lulzim Basha ka nxjerrë aleatin e tij Nard Ndoka, i njohur ky i fundit i njohur si politikan i kompromiseve.
Kreu i PDK, Nard Ndoka deklaron se opozita do heqë dorë nga aksionet agresive si mosbindja civile deri në vendimmarrjen e BE në muajin qershor për çeljen e negociatave.
Ndoka theksoi se Basha dhe Rama mund të shkojnë drejt një marrëveshje për çështje madhore siç është qeverisja e vendit.
“Marrëveshja duhet të jetë për gjëra madhore, siç është qeverisja, integrimi nuk është në dorën e Ramës e Bashës, por nga vendimmarrja politike e BE.
Opozita po tregon përgjegjësinë e vet, nëse kemi pasur një aksion të egër deri në mosbindjen civile, afati deri në vendimmarrjen politike të BE, do ta detyrojë opozitën të kthehet në politikën e vet institucionale.
Pavarësisht se është e rëndësishme me një maxhorancë të tillë, ku priten të plasin skandalet nga lufta e brendshme, opozita do ketë një mision tjetër.
Duhet marrëveshje për të ardhmen politike të vendit, por edhe për qeverisjen e vendit”, deklaroi Ndoka për mediat.
Duke nënvizuar faktin se protestat do të humbasin agresivitetin në funksion të arritjes së bashkëqeverisjes Rama-Basha, ai tha se gjithçka bëhet në funksion të integrimit.
“Do të ketë protesta, por jo një agresivitet të asaj natyre që të bëhet Shqipëria lajm në mediat ndërkombëtare në aspektin negativ. S’do ketë një datë për një protestë të madhe çka do ta kapitullonte Ramën dhe qeverisjen e tij. Në këtë sens ka një lloj maturimi”, thotë Ndoka.
Përzgjedhja e Nard Ndokës kreut të PDK nga ana e Bashës për të artikuluar ftesën për Ramën për një qeveri të përbashkët, ka dy elementë të veçantë.
E para nëse Rama e pranon ftesën e Bashës atëherë gjithçka funksionon në bashkëqeverisje PS-PD dhe Nard Ndoka do të jetë dhe ai pjesë si kontributor.
Nëse Rama e refuzon përfshirjen në qeveri të PD dhe Bashës, atëherë kreu demokrat do të dalë dhe do të thotë se kjo ishte një ide personale e Nardit.
Por në krye të herës, Basha më se një herë e ka artikuluar idenë e një qeverisjeje PS-PD, për të cilën punoi para zgjedhjeve të vitit të kaluar.
Vetëm fakti se Rama mori 74 deputetë më 25 qershor shuajti shpresat e Bashës për të qeverisur bashkë me Ramën./Pamfleti.com
