Komisioni i Pavarur i Kualifikimit ka zbardhur dje vendimin për shkarkimin e Fatmira Hajdarit nga detyra. Përveç pasurisë së pajustifikuar, një element që e penalizoi ishte se nuk ka deklaruar që SHBA i ka bllokuar vizën.
“Pas analizimit të dokumentacionit të sipërcituar, Komisioni konstatoi se në deklaratën për kontrollin e figurës, sipas shtojcës 3 të ligjit nr. 84/2016, dorëzuar fizikisht në datën 27.1.2017, germa “g”, në pjesën 5, pyetjes nëse i është refuzuar hyrja në ndonjë shtet të BE-së/NATO-s, gjatë 10 viteve të fundit, subjekti i rivlerësimit i është përgjigjur “jo”, ndërkohë që nga pasaporta, në f. 29 të saj, konstatohet se subjektit të rivlerësimit, znj. Fatmira Hajdaraj, i është revokuar VISA e tipit B1/B2 për në SHBA, shtet i cili është anëtar në NATO.
Nga informacionet e marra nga organet kompetente, konfirmohet se subjekti i rivlerësimit është njoftuar personalisht, ose me shkrim në datën e revokimit të vizës (datë 26.1.2017). 7. Duke marrë në konsideratë faktin që Ambasada e SHBA-së, në një deklaratë për shtyp të datës 26.1.2017, ka deklaruar se do të përdorë të gjitha mjetet ligjore që ka në dispozicion për revokimin/refuzimin e vizave të gjyqtarëve dhe prokurorëve të k.orruptuar.
Kjo deklaratë është bërë në të njëjtën kohë që subjektit të rivlerësimit i është revokuar viza për në SHBA”, thuhet në vendim. Por gjyqtarja këmbëngul se nuk ka mashtruar sepse në kohën kur ka bërë deklarimin nuk kishte dijeni se i ishte bllokuar viza. “Subjekti, gjithashtu, deklaron se vula e vendosur mbi vizë nuk shoqërohet me ndonjë datë, në mënyrë që ta konfirmonte atë dhe se deklaratën për kontrollin e figurës e ka plotësuar në datën 26.1.2017, dhe dorëzuar në mëngjesin e datës 27.1.2017, duke mos pasur asnjë dijeni në lidhje me deklaratën e Ambasadës së SHBA-së për revokimin e vizave të disa gjyqtarëve dhe prokurorëve, deklaratë kjo pa emra konkretë.
Në fund, subjekti njofton se për të qenë korrekt në këtë deklarim, i është drejtuar Ambasadës së SHBA-së në Tiranë, me dy e-mail-e dhe një letër dërguar nëpërmjet Postës Shqiptare, duke i kërkuar konfirmim e datës së revokimit të vizës dhe datën e marrjes në dijeni në lidhje me revokimin e vizës, fakt të cilin e provon me informacionin e dërgimit të dy email-eve”, thuhet në vendim.
