Presidenti i Tiranës, Refik Halili, i është bashkuar Ilir Metës, në sulmin ndaj gazetës TemA.
Ai pretendon, ashtu si Ilir Meta, se ne e paskemi quajtur klubin e Tiranës, terrorist.
Gjë që normalisht nuk është e vërtetë.
Halili ashtu e ka hallin në fakt, dhe do të bëjë lojën e Metës.
Por, mirë është të mos luajë me emrin e Tiranës, në këtë lojë të fëlliqur politike, kur akuzon TemA-n se kemi bërë akuza raciste kundër klubit të tij dhe e paskemi sulmuar edhe herë tjetër.
Në fakt, nuk jemi marrë aq sa duhet me të, pasi Refik Halili është një nga borxhlinjtë më të mëdhenj në shtet, dhe e ka përdorur për shumë vite Tiranë, për pazare të pista.
Vetëm dy vite më parë, ai e rrëzoi ekipin nga Superliga, pikërisht prej këtyre pazareve.
Për më tepër thuhet se është futur borxh tek një eksponent i njohur i krimit, përveçse tek shteti.
Ndaj, nëse ka njeri që duhet t’i kërkojë falje Tiranës, është pikërisht ai, Refik Halili, njeriu që e ka përdorur Tiranën për pazare dhe e ka zhytur në borxhe.
Për atë mund ta themi me plot gojën fjalë “terrorist”, por jo nga ata që hedhin bomba e vrasin njerëz, por nga ata që i kanë vënë fitilin e falimentimit prej vitesh Tiranës, që pa mbylljen e syve nga FSHF dhe pa ndihmën e Bashkisë, ndoshta sot do të kishte fatin e Dinamos.
Tani Refik Halili paska gjet si shpëtim Ilir Metën, por duhet ta dijë, se ai është nga ata që merr, jo që jep.
Dhe Halili në këto momente s’ka çfarë jap, se boll borxhe ka.
As mbështetje nuk i jep dot Metës, që kërkon vota nga tifozët e Tiranës, pasi Halili është njeriu më i padëshiruar nga tifozët e Tiranës, për shkak të asaj që i ka bërë këtij klubi për vite me radhë.
