Diego Armando Maradona ishte një gjeni në fushën e futbollit dhe ndoshta më i madhi i të gjitha kohërave.
Por jashtë saj, jeta e tij nuk ishte ajo e duhura, çka ndikoi në ndarjen e parakohshme nga kjo botë.
Droga, obeziteti, femra, por dhe lidhjet me Kamorrën e famshme në Itali, janë ato që shenjuan jetën e tij, përveç futbollit.
Maradona arriti lavdinë me Napolin dhe Argjentinën, por pati shumë probleme me jetën e tij jashtë fushe.
Maradona lindi në një familje të varfër katolike në 38 tetor 1960 dhe ishte shumë i lidhur me të.
Aq sa, kur tregoi një faturë telefonike, zbuloi se harxhonte plot 15 mijë dollarë në muaj, për të folur me familjarët e tij.
Ai debutoi si futbollist në moshën 16-vjeçare dhe zhvilloi 491 ndjeshje për Boca Juniors, Barcelonën dhe Napolin dhe 91 ndeshje për Kombëtaren e Argjentinës.
Por, përkundër karrierës së tij shumë të suksesshme në futboll dhe martesës në 1984 me të dashurën e tij të fëmijërisë, Claudia Villafane, nga mesi i viteve 1980, Maradona u bë i varur nga kokaina, pasi kishte filluar të përdorte drogë kur luante për Barcelonën.
Kur kaloi tek Napoli, ai krijoi varësi nga droga.
Pasi fitoi kampionatin dhe Kupën Uefa, Maradona fitoi statusin e një perëndie në Napoli, por kishte shumë presion dhe ndiqej në çdo hap nga gazetarët dhe tifozët.
Kjo bëri që ai të lidhej me Kamorran, e cila i ofroi mbrojtje, por dhe i siguronte drogë dhe festa të çmendura.
Në atë kohë pati edhe lidhje jashtëmartesore, e cila u bë publike.
Në vitin 1991, pas një telefonate të përgjuar mes Maradonës dhe një prostitute, ndaj yllit argjentinas u ngritën akuza për posedim dhe shpërndarje të kokainës.
Ndërsa pas një analize të kryer, në gjakun e tij u zbulua përdorimi i drogës dhe ai u ndalua të luante për 15 muaj muaj.
Për këtë u largua në Argjentinë, por aty u arrestua pasi në banesë iu gjet 1 kg kokainë.
Në Kupën e Botës më 1994, ai u përjashtua, pasi rezultoi pozitiv në testin për përdorimin e drogës.
Ndërsa në vitin 1998, kur e kishte lënë futbollin, u dënua me dy vjet e 10 muaj burg, pasi gjuante si i çmendur me armë nga makina e vet, në drejtim të një gazetari, ngjarje kjo e ndodhur më 1994.
Ai ndërkohë, përveç drogës, kishte varësi edhe për femrat, duke pasur gjatë jetës së vet dhjetëra të dashura, madje edhe kur ishte i martuar.
Përveç të shoqes, Claudia Villafane, publikisht ai pati lidhje edhe me Heather Parisi, Cristina Sinagra, Veronica Ojeda e Rocio Oliva, ndërkohë që kishte dhjetëra femra të tjera me të cilat ai shkonte gjatë kohës që ishte i martuar.
Ndërkohë, edhe pse fitoi dhjetëra milionë dollar pasuri, ato u zhdukën për shkak të jetës së shthurur të tij.
Në vitin 2009, rezultonte se ai i kishte borxh shtetit italian 37 mln euro, për shkak të taksave të papaguara.
Për këtë arsye, për vite të tëra ai nuk shkeli në Itali dhe në Napolin e tij të dashur, nga frika e arrestimit.
Problem tjetër i tij, ishte edhe pesha.
Në një moment, Maradona ka shkuar edhe 135 kg, ndërsa kishte lënë futbollin.
Ndërkohë, ai ka qenë i famshëm edhe për miqësitë kontroverse me diktatorë të tillë si Fidel Castro apo Hugo Chavez.
Megjithatë, pavarësisht një jete të shthurur dhe jo model për një njeri të përmasave të tillë, Diego Armando Maradona do të mbetet përjetë në historinë e futbollit, si një nga më të mirët.
Ndoshta më i miri!
