Ashpërsohet beteja për Gjykatën Kushtetuese. Prej disa vitesh KED akoma nuk e ka bërë funksionale këtë gjykatë ndërsa nga dita në ditë dalin në pah faktet se për kapjen e Kushtetueses po bëhet luftë mjaft e fortë.
Presidenti po punon fort që të emërojë të besuarit e tij, por ajo që bie në sy është se njerëzit e tij janë futur në sherr me njëri-tjetrin. Një emër për të cilin Meta u ankua deri në Venecia është ai i kandidates Zhaklin Peto. Por KED e drejtuar nga Vitore Tusha e skualifikoi nga gara pavarësisht se Apeli Administrativ e ktheu në garë. Kjo ka sjellë përplasje mes Petos dhe Tushës, edhe pse të dyja njihen si të afërta me presidentin.
“Vitore Tusha shprehet se kuorumi minimal për zhvillimin e mbledhjes plotësohet dhe përsa kohë anëtarët nuk shprehën ndonjë rezervë, vazhdon me rendin e ditës. Vë në dijeni Këshillin në lidhje me kërkesën e kandidates znj. Zhaklina Peto, e cila ka konkurruar në vendin vakant të shpallur nga Presidenti i Republikës në datën 22.11.2019.
Kjo kandidate, ditën e enjte, ka paraqitur një kërkesë për përjashtimin e relatores së vakancës së saj znj. Miranda Andoni, kërkesë që në përputhje me kompetencën e zv/kryetarit, në vijim të marrjes dhe ushtrimit të kompetencave të kryetarit, është shqyrtuar dhe është rrëzuar, pasi është vlerësuar se nuk kishte konflikt interesi. Ky vendim i është komunikuar kandidates në rrugë elektronike dhe me postë, si dhe është publikuar në faqen zyrtare”, thuhet në procesverbalin e KED të datës 23 nëntor. Por Peto ka vijuar betejën dhe me Tushën.
Pasi ka kërkuar dhe largimin e saj nga drejtimi i mbledhjes. “Ditën e mbledhjes kjo kandidate i është drejtuar Këshillit me kërkesë, ku kërkon përjashtimin e relatores znj. Miranda Andoni, si dhe përjashtimin e zv/kryetares znj. Vitore Tusha nga kjo procedurë, pezullimin e kësaj mbledhje në lidhje me shqyrtimin e vakancës së saj, si dhe ribërjen e shortit për këtë vakancë.
Sjell në vëmendje se vakanca nuk ka vetëm një kandidat, por disa të tillë dhe se Këshilli duhet të diskutojë në lidhje me këtë situatë. Kërkon të mos marrë pjesë dhe të paktën të diskutohet në lidhje me kërkesën për përjashtimin e zv/kryetares, pasi të njihen me vendimin në lidhje me rrëzimin e kërkesës për përjashtimin e relatores, znj. Miranda Andoni. Sipas rregullave, kur nuk është zv/kryetari, mbledhjen e drejton anëtari më i vjetër në moshë”, thuhet më tej në procesverbal.
Diskutimet
Në mbledhje ka marrë fjalën dhe anëtarja Saida Dollani. Sipas saj, nuk ka konflikt interesi sepse është vetë ligji që ka parashikuar se për shkelje procedurale, kandidati i drejtohet gjykatës, që në rast se e rikthen çështjen, pra e shfuqizon vendimin, Këshilli është i detyruar ta shikojë atë. “Kjo qëndron. Ky është një parashikim ligjor dhe ligji nuk e parashikon si një pengesë për të marrë pjesë në rishqyrtim, përkundrazi. Gjithashtu sjell në vëmendje problemin që krijohet nëse dy anëtaret e Këshillit nuk marrin pjesë në diskutim duk
e theksuar se në këtë rast nuk ka kuorum as për të diskutuar”, tha ajo. Më tej e ka marrë fjalën Vitore Tusha ku u shpreh se i ka lexuar me shumë vëmendje të gjitha detajet e kërkesës dhe vlerëson se nuk është në konflikt interesi. “Shprehet se nuk është në papajtueshmëri, por në ushtrimin e kompetencave që i janë dhënë që në 1 janar 2020 dhe në ushtrim të detyrës me shumë përpikëri.
Thekson se vendimin për rrëzimin e kërkesës për përjashtimin e relatores e ka arsyetuar dhe e ka njoftuar menjëherë, në mënyrë që kandidatja të kishte dijeni për mënyrën e interpretimit të ligjit dhe procedurës dhe se nga kush do të shqyrtohej kandidatura e saj. Fton anëtarët të shprehen, pasi paanësia është një çështje që i përket Këshillit,përtej interesit vetjak. Shprehet se nuk vlerëson se është në konflikt interesi”, thuhet në procesverbal.
