Gjykata e Lartë pritet që të jetë shumë shpejt me kapacitete edhe më të plota. Kjo gjykatë është më e dëmtuara nga vetingu, pasi shumë dhanë dorëheqjen dhe shumë të tjerë ngelën në procesin e rivlerësimit. Dje Këshilli i Lartë Gjyqësor ka kualifikuar 3 emra të tjerë për të qenë pjesë e kësaj gjykate.
“Sot, në datën 04.12.2020, Këshilli i Lartë Gjyqësor zhvilloi mbledhjen plenare të radhës, në të cilën shqyrtoi çështjet si vijon: Në vijim të shqyrtimit të kandidaturave për ngritjen në detyrë në Gjykatën e Lartë, nga radhët e gjyqtarëve, Këshilli vendosi kualifikimin e kandidatëve dhe vijim e procedurave të emërimit për z. Gentjan Medja, z. Asim Vokshi, si dhe znj. Manjola Xhaxho, përkatësisht për pozicionet e lira në fushën e së drejtës administrative dhe civile.
Gjithashtu, në vijim të verifikimit të thelluar të kushteve dhe kritereve ligjore të kandidimit, Këshilli vendosi kualifikimin për në formimin fillestar në Shkollën e Magjistraturës, për magjistrat, profili gjyqtar, për vitin akademik 2020-2021, për kandidatët znj. Elena Tafa, znj. Juliana Pjetri, znj. Klodjana Kryeziu, znj. Olta Cenaj dhe z. Noel Veizi”, tha KLGJ. Vetingu në sistemin e drejtësisë i dha një shuplakë të fortë Gjykatës së Lartë.
Emra si Zaganjori ngelën në veting, por shumë të tjerë u dorëhoqën. Fati i tyre ishte se në momentin që nisi procesi i vetingut iu kishte mbaruar mandati dhe për këtë arsye nuk pranuan të kalonin si gjyqtarë Apeli duke mbyllur karrierën për 15 vite. Por nga ana tjetër pati dhe disa nga ata që tentuan të shpëtojnë statusin e magjistratit.
Edhe pse refuzoi Apelin, Arjana Fullani luftoi fort në komisionet e vetingut që të mos përjashtohej për 15 vite, por në fund nuk ia doli dot. Komisioni i Posaçëm i Apelimit e nxori për 15 vite nga sistemi. E njëjta gjë ka ndodhur dhe me Gjykatën Kushtetuese, ku vetëm një anëtare e kaloi vetingun, ndërsa gjithë të tjerët ngelën në proces.
