Kryeministri Edi Rama pritet të bëjë spastrime të forta në janar sa i takon listës së kandidatëve për deputet të Partisë Socialiste për zgjedhjet parlamentare të 25 prillit.
Me ndryshimet e reja në Kodin Zgjedhor, të cilat tashmë kanë hyrë në fuqi dhe janë njohur edhe nga Komisioni i Venecias, lista e kandidatëve për deputetë do të jetë e hapur, ndërsa qytetarët do të kenë mundësi të votojnë për emrin që duan. Për këtë arsye socialistët kanë nisur kalkulimet, në mënyrë që të paraqesin para qytetarëve emrat më të mirë, me qëllimin e vetëm që të marrin sa më shumë vota.
Sot që flasim PS ka pa mbyllur procesin “Deputeti që duam”, ndërsa kryeministri Edi Rama dhe gjithë strukturat e partisë kanë nisur “gjuetinë” për të afruar pranë Partisë Socialiste sa më shumë emra dinjitozë, të cilët priten që t’i kandidojë për deputetë.
Por gazeta ka mësuar se shefi i socialistëve, pritet që të shkaktojë një furtunë të vërtetë në lista, pasi është shumë i pakënaqur me punën e disa prej deputetëve aktualë, të cilët madje si publikisht apo edhe në prapaskenë i ka akuzuar se janë në gjumë dhe ndërkohë i ka paralajmëruar se nuk do t’i kandidojë në zgjedhjet e ardhshme.
Në këtë kontekst, burime të sigurta nga selia rozë theksuan se Rama iu ka dërguar një mesazh deputetëve, të cilëve iu ka kërkuar që të punojnë fort dhe bërë me dije se janë në monitorim nga ai. Mësohet se ai ka shprehur pakënaqësi ndaj tyre, të cilëve në mesazh i ka porositur që të zbresin me këmbë në tokë dhe të shtojnë kontaktet me bazën, pasi edhe pak kohë i ndan nga dita kur do ta marrin vesh nëse do të jenë apo jo pjesë e “gladiatorëve” që do zbresin në fushën e betejës të dielën e 25 prillit.
Rama në janar mbledh Asamblenë
Kështu sipas informacioneve, mësohet se kryeministri Edi Rama ka njoftuar deputetët se e ka në plan që të mbledhë Asamblenë e Partisë Socialiste në muajin janar, nga ku do të bëjë edhe publike listën e kandidatëve që PS do të paraqitet para qytetarëve në zgjedhjet parlamentare të 25 prillit.
Por duke qenë se vetë Rama është i pakënaqur me një pjesë të ligjvënësve aktualë dhe për shkak të procesit të hapjes së partisë, pritet që të përjashtohen apo mos kandidohen rreth 40 për qind e deputetëve nga listat e kandidatëve.
Mësohet se 20 për qind e emrave që do të kandidohen do të vijnë nga ata që janë përzgjedhur dhe kanë aplikuar tek portali “Deputeti që duam”, ndërsa 20 përqindëshi tjetër do të jetë ekskluzivitet i kryeministrit dhe propozim i strukturave të Partisë Socialiste, të cilët do të jenë emra që janë intelektualë, gëzojnë popullaritet në zonën ku do të kandidojnë për deputet, janë njerëz të rëndësishëm dhe mbulojnë fusha të caktuara si shkencë, kulturë, sport apo biznes.
Pra, sikundër theksuan të njëjtat burime shefi i socialistëve jo vetëm që ka dëshirë që të mbledhë Asamblenë duke respektuar edhe masat anti-covid, sikundër bëri herën e fundit, të cilën e mblodhi në ambient të hapur tek Amfiteatri te Liqeni Artificial, por pritet që të bëjë një revolucion të vërtetë në PS, pasi pritet që të përjashtojë 40 për qind të deputetëve nga lista e kandidatëve, për shkak se është i pakënaqur me shumë emra dhe punën e tyre. Megjithatë, mbetet të shihet në ditët në vijim se çfarë do të ndodhë më konkretisht.
