Prokuroria dhe autoritetet e tjera ligjzbatuese dhe financiare në vend janë bërë bashkë për të luftuar pastrimin e parave.
Shumë raporte ndërkombëtare tregojnë se në vendin tonë bota e krimit dhe të korruptuarit pastrojnë paratë me mënyra nga më të ndryshmet, sidomos përmes ndërtimit. Por Prokuroria e Përgjithshme dhe autoritet e tjera kanë vendosur të marrin shembullin italian, i cili ka rezultuar shumë i suksesshëm në goditjen e mafies dhe sekuestrimin e pronave të tyre.
Ligji antimafia që ne kemi është marrë nga Italia dhe autoritetet e Romës po asistojnë ato shqiptare. Pak ditë më parë misioni PAMECA ka organizuar një seminar mes autoriteteve shqiptare dhe atyre italiane për të diskutuar mbi pastrimin e parave. Trajnimi u ndoq nga 60 përfaqësues të Prokurorisë, Policisë së Shtetit, SHÇBA dhe agjencive të tjera ligjzbatuese, të tilla si ILDKPKI, DPPPP, Zyra e Taksave dhe Doganave, etj.
“Qëllimi kryesor i këtij trajnimi është përafrimi i qasjeve institucionale dhe praktikave të punës, në kuadër të Memorandumeve të Mirëkuptimit të nënshkruara mes Prokurorisë së Përgjithshme dhe Agjencive Ligjzbatuese të tjera në rritjen e efikasitetit të hetimit të korrupsionit dhe pastrimit të parave. Seminari u bashkë-prezantua nga Eksperti Afatgjatë i PAMECA V për Krimin e Organizuar, Z. Giovanni Pasqua dhe Prokurori i pranë Prokurorisë së Përgjithshme, Z. Kujtim Luli.
Gjatë fjalës së tij të hapjes, Z. Pasqua nënvizoi iniciativën e PP dhe rëndësinë për të kryer trajnime mbi pastrimin e parave dhe hetimet financiare, sipas përparësive kryesore të PP për vitet e ardhshme, ndërsa Z. Luli shpjegoi qëllimin dhe implikimet pozitive që zbatimi i Memorandumit të Mirëkuptimit mund të ketë për Shqipërinë dhe mundësinë për t’iu përgjigjur rekomandimeve të FATF, botuar shkurtin e kaluar”, njoftoi PAMECA.
Pakti mes institucioneve
Ndërkohë pak kohë më parë 6 institucione në vend kanë arritur një marrëveshje për të goditur pastrimin e parave. Prokuroria e Përgjithshme firmosi një marrëveshje me Ministrinë e Brendshme, atë të Financave, Doganat, Tatimet dhe Pastrimin e Parave për t’u bërë bashkë kundër këtij fenomeni.
“Në nivel qendror do të ngrihet një strukturë e cila do të veprojë si një organ monitorues e koordinues, për të analizuar e vlerësuar ecurinë e zbatimit të masave institucionale apo ndërinstitucionale dhe/ose problematikat e evidentuara në zbatimin e tyre, si dhe për të koordinuar zbatimin e planeve operacionale dhe ekspertizave të përbashkëta apo rekomandimeve në lidhje me ndërgjegjësimin e publikut në interes të bashkëpunimit për hetimin e veprave penale objekt i fushës së veprimit të këtij Memorandumi dhe rritjen e efikasitetit në hetimet e këtyre veprave penale në kuadrin ndërinstitucional”, thuhet në marrëveshje.
Ndërsa në nivel vendor secili institucion përcakton pikat e kontaktit me përfaqësues nga strukturat e posaçme ose përkatëse (kundër pastrimit të parave, financimit të terrorizmit, krimeve financiare dhe për hetimet pasurore) dhe/ose drejtuesit e institucioneve vendore përkatëse, për bashkëpunimin apo bashkërendimin lidhur me kërkimin dhe vlerësimin e informacioneve dhe/ose referimeve/kallëzimeve penale apo kryerjen e hetimeve proaktive, identifikimin e aseteve/pasurive produkt ose të ardhura nga veprimtaria kriminale, si dhe për kryerjen e detyrave të përbashkëta në ecurinë e hetimeve apo ndjekjes penale në çështjet komplekse dhe koordinimin/monitorimin e veprimtarive të përbashkëta sipas ligjit.
