Me rastin e fillimit të Vitit të Ri 2021, i cili është dhe viti i zgjedhjeve, Bilushi i Metës vendosi të shpallë dhjetë figurat e opozitës që do motivojnë shqiptarët për ndryshimin e madh.
1.Sali Berisha sipas parimit shqiptar “e treta e vërteta”! Dy herët e tjera që ka qenë në pushtet ka ikur një herë pasi ka vrarë 3 mijë vetë më 1997 dhe një herë duke vrarë 30 vetë (26 në Gërdec plus katër në Bulevard). Pra në krahasim me 1997 ai pati një përmirësim 100 herë. Me këtë ritëm i bie që ai të vrasë 0,3 njerëz në këtë mandat, ose afërsisht çerek njeriu. P.sh. është sikur të thuash që do vrasë Bujar Nishanin.
2.Ilir Meta. Zoti Meta ka një avantazh më shumë se Berisha. Ai e ka herën e katërt që do kthehet në pushtet. Ai ka qenë në pushtet më 2000, 2009 dhe 2013. Herën e tretë e kishte sloganin “me qetësi dhe dashuri”. Këtë radhë do ketë sloganin “Katër herë nuk gabon njeri”.
3.Lulzim Basha shembull i gjallë i vitalitetit dhe eficencës në opozitë. Kur gjithë liderët e opozitës ankohen për burime financiare dhe mundësi biznesi, kunati i tij ka tre kompanitë më të suksesshme të biznesit dhe ai vetë ka mundur të blejë katër vila, dy në bregdet dhe dy në Tiranë. Kjo do të thotë se është i pamposhtur para çdo situate. Besoni tek ai.
4.Monika Kryemadhi. Gruaja që mposhti covid me hudhra e mjaltë dhe njësoj si Shota Galica mbajti të fshehte sekretin që dhe burri i saj u sëmur nga COVID që të mos merrte revansh armiku. Rikthimi i saj në pushtet zhduk çdo gjurmë të COVID19.
5.Fatmir Mediu. Ëndrra e tij është një Shqipëri ekologjike, e pastër, pa mbetje luftarake, pa korrupsion , dhe mbi të gjitha pa Erion Veliajn, që i ka marrë atij dhe gjënë më të shtrenjte, këngëtaren e tij të preferuar. Këto ëndrra ja preu në mes “Gërdeci” dhe nuk e lanë ta realizonte Por koha e tij po vjen.
6.Nard Ndoka. Ëndrra e tij ka qenë është dhe do mbetet, që ai të mos jetë kurrë humbës në zgjedhje. Për këtë ai i ka propozuar kolegëve opozitarë formulën magjike: S’ka rëndësi sa vota ke, rëndësi ka ‘shko me fituesin dhe nuk ke humbur’.
7.’Stresi’! Ai ka dhënë prova se më shumë njerëz i mblidhen në shesh kur u bën thirrje të thyejnë dyqanet në Tiranë se sa në një koncert. Lufta e tij e vazhdueshme me Noizin tregon se ai për muzikën është gati të japë jetën, kurse për PD fal dhe muzikën.
8.Shpëtim Idrizi. Të gjithë ishin kuriozë pse një doganier u bë ithtar i çështjes çame. Por shpjegimi është shumë i thjeshtë. Problemin më të madh komuniteti çam, e ka në doganë kur kalon dhe pa zgjidhur këtë çështje ai nuk tërhiqet nga politika.
9.Bujar Nishani. Ai është simbol i njeriut që nuk dorëzohet. E nisi presidencën si njeriu me paterica, dhe vazhdoi betejën në opozitë si njeriu me panolina, sipas Doktor Kosovës. Rikthimi i PD në pushtet do t’i rikthejë mustaqet që i takojnë.
10.Qim Peka. Njeriu i vetëm në këtë vend që ka arritur t’i marr lekë Shkëlzen Berishës, i cili kishte krijuar mitin që vetëm merrte lekë. Duke e ç’mitizuar këtë gjë, ai na ka hequr të gjithëve dyshime se dhe nëse vjen PD në pushtet Zeni nuk do marrë më lekë, por vetëm do japë.
